Navigate / search

Aaja ilisimasat taamaassorinninnerillu pillugit ilagiinnut aamma kulturimut ministerimik oqaloqateqartoq

Asseq: IA Folketingimi
Asseq: IA Folketingimi

Aaja Chemnitz Larsenip, Inuit Ataqatigiit sinnerlugit folketingimi ilaasortaasup ullumikkut ilagiinnut kulturimullu ministeri, Mette Bock, ataatsimeeqatigivaa. Ataatsimeeqatigiinnermi paaseqatigiinnerunissamut ilisimasaqarnerulernissamullu kiisalu taamaassorinnilersarnerit ingalassimaartinnissaannut kalaallit eqqumiitsuliaasa kulturiata qanoq atorluarneqarsinnaanerinut tunngasut eqqartorneqarput. Sapaatip akunnerata siuliani Aaja Chemnitz Larsenip kalaallit eqqumiitsuliortut qulit kalaallit eqqumiitsuliaannut kulturiannullu tunngasunik oqaloqatigiinnissamut qaaqquai. Tassanngalu eqqarsaatersuutit isumassarsiallu pisat ilagiinnut kulturimullu ministerimut ingerlateqqinneqarput.

Ullumikkut kalaallit 16.000-it sinneqartut Danmarkimi najugaqarput, taakkunanngalu ikinnerussuteqartut ajornartorsiuteqartutut inissisimapput, amerlanerussuteqartut pitsaasunik atugaqarlutik inooqataalluartuusut. Inuttulli Pisinnaatitaaffinnut Institutimit nalunaarusiaq naapertorlugu kalaallit Danmarkimiittut 15-20%-ii immikkoortinneqarnermik misigisaqartarput, ilaatigut pisortaniit.

Aaja Chemnitz Larseni nassuiaavoq: ”Danmarkimi, Nunani Avannarlerni nunarsuattalu sinnerani  kalaallit eqqumiitsuliaat kulturiallu ullutsinni Kalaallit Nunaannut tunngasutigut paasisimasaqarnerulernissamut peqataasarput. Arlalippassuartigut eqqumiitsuliortut oqaasissaqarluartuusarput, eqqumiitsuliatillu aqqutigalugit oqallitsitsinernik oqaloqatigiinnernillu pilersitsisartuullutik.”

Ilagiinnut aamma kulturimut ministeri pisamut tamatumunnga paasinnilluarpoq, kalaallinullu Danmarkimiittunut naalakkersuisut tungaanniit atukkatigut qanoq pitsanngorsaasoqarsinnaaneranut tunngatillugu oqaloqatigiinnerit nanginneqarnissaannut kajumissaarivoq.

Aaja Chemnitz Larsen oqarpoq: ”Kalaallit kulturiannik, filminut, qalipakkanut uumassusiliinernullu il.il. tunngasutigut saqqumilaartitsinissat pisariaqarput. Tassa katersugaasivissuarni, TV-kkut, filmitigut atuakkiallu eqqarsaatigalugit. Kulturimut ministerip kalaallit eqqumiitsuliaannik kulturiannillu Danmarkimi siuarsaanissaq peqataaffigerusuppaa. Ministerillu peqataarusunnera suliap ingerlateqqinnissaanut aallaavissaqqissuuvoq.”

Ataatsimeeqateqarneq Aaja Chemnitz Larsenip danskit naalakkersuisortaavisa ataatsimeeqatigiortorneranni ataatsimiinnerit aappassaraat. Siullermillu ataatsimeeqatigineqartoq tassaavoq ilinniartitaanermut ministeri, Merete Riisager Andersen, taamatuttaaq danskit meeqqanut atuarfianni ilinniusiornermi kalaallit suliamut ilisimasallit eqqumiitsuliortullu atorneqarnissaannut akuersortoq.

Ataatsimiinnermittaaq Danmarkimi kalaallinut ilagiinnut palasit amerlineqarnissaannut kissaatigisaq saqqummiunneqarpoq.
Uunga Link ILO-konvention nr. 169 af 28. juni 1989 vedrørende oprindelige folk og stammefolk i selvstændige stater

Print Friendly, PDF & Email