fbpx

Aaja: Danmarkimi meeqqat inuusuttullu ullutsinni Kalaallit Nunaat ilisimasaqarfigissavaat

Danmarkimi Kalaallit Nunaat pillugu ilisimasaqarnerup pitsanngorsarnissaa pisariaqarpoq. Danmarkimi pisortatigoortumik ilisimasanut tunngatillugu ataqatigiiffissamik pilersitsisoqarnissaa Folketingimi ilaasortap Aaja Chemnitz Larsenip taperserpaa, ’ullutsinni Kalaallit Nunaat’ Naalagaaffeqatigiinnerlu Danmarkimi meeqqat atuarfiini inuusuttullu ilinniarfiini ilisimatusaataanissaat pilersitsinerup qulakkiissavaa.

Danmarkimi meeqqat inuusuttullu akornanni ’ullutsinni Kalaallit Nunaata’ qanoq ittuuneranut ilisimasat amigarput. Ajornartorsiutip mumisinnissaanut pisortatigoortumik ilisimasanut ataqatigiiffissamik pilersitsisoqarnissaa Aaja Chemnitz Larsenip taperserpaa, maanna Kalaallit Nunaannut Naalagaaffeqatigiinnullu tunngasut Danmarkimi meeqqat atuarfiini inuusuttullu ilinniarfiini ilisimasaqarfigilernissaat pilersitsinerup qulakkiissavaa.

Eqqarsaatigissagaanni atassuteqarnitta kingumut ukiuni 300-ni piusimanera aammalu inuusuttut inersimasullu kalaallit Danmarki pillugu ilisimasaannut sanilliutissagaanni, Danmarkimi Kalaallit Nunaat pillugu ilisimasat ernumanaannartumik appasipput.

Maannaagallartoq Kalaallit Nunaat Naalagaaffeqatigiillu pillugit ilinniartitaaneq taamaallaat faagimi oqaluttuarisaanermi ingerlanneqartussatut inissinneqarsimavoq. Pissutsit taamaakkallartillugit Danmarkimi Kalaallit Nunaannut assigiinngisitaanngitsumik qangarpaluttumillu isiginninnermik piujuartitseqataassapput. Folketingimi ilaasortaq malillugu, taamaallaat ’oqaluttuarisaanermi Kalaallit Nunaat’ taamatullu ’ullutsinni Kalaallit Nunaajunngitsoq’ tusarneqartassappat aalajangersimasunik isummereernernik pilersitseqataassaaq. Ilinniartitaanermut Ministereqarfiup nalunaarusiaani 2019-imeersumi, meeqqat inuusuttullu qallunaat ullutsinni Kalaallit Nunaat Naalagaaffeqatigiillu pillugit ilisimasakinnersaanerat takutinneqarmat ajornartorsiut aamma erserpoq.

”Kalaallit Nunaata Danmarkillu akornanni isummereersimasarnerit piujunnaarnissaat naligiinnerullu nukittorsarnissaa kissaatigaara.

Misilittakkakka malillugit, ilisimasat sakkugalugit kalaallinik ilisimatitsillunilu peqataatitsilluni anguneqarsinnaavoq. Taamaammat Folketingimi suleqatiga Edmund Joensen peqatigalugu Danmarkimi pisortatigoortumik ilisimasanut ataqatigiiffissamik pilersitsisoqarnissaa taperserparput. Taamatuttaaq neriulluta siunissami ataatsimiinnerpassuit siullersaannut Christiansborgimiittoqarnissaa inississimavarput.”

Danmarkimi Kalaallit Nunaat Savalimmiullu pillugit ilisimasanut ataqatigiiffissaq pisortatigoortuuvoq nutaaq, ullutsinni Naalagaaffeqatigiinnut tunngasunik ilisimasanik siammarterinissamik siunertaqartoq. Danmarkimilu, Savalimmiuni Kalaallillu Nunaanni tamanit iluaqutigineqassalluni. Tamanna Folketingimi Inuit Ataqatigiit taperserusuppaat.

Aaja Chemnitz Larsen, aaja.larsen@ft.dk, +456162 4667

del på de sociale medier

Share on facebook
Share on twitter
Share on linkedin