Navigate / search

Aaja Chemnitz Larsen: Aalisarnermut politikki akisussaassuseqanngitsoq unitsilli

Asseq: Inuit Ataqatigiit Folektingimi

Kalaallit Nunaanni ullutsinni aalisarneq avammut tunisinermi ataatsimut isigalugu 93%-imik annertussuseqarpoq. Oqarsinnaavugut aalisakkanik tunisinermit inuussuteqarluta. Taassumap saniatigut Kalaallit Nunaanni aningaasanik isertitsineq isigissagutsigu affai naalagaaffimmit tapiissutinit pisarput. Kalaallit Nunaanni aalisarneq ajalusuussagaluarpat nunami aningaasaqarnermut atugarissaarnermullu sunniuteqartorujussuusussaavoq.

Pisassarititanik politikkikkut qaffaanerit ingerlaartut, aalisakkat milliartuinnavissut ukiullu ikitsut ingerlaneranni aalisartunik amerliartortoqarnera Kalaallit Nunaanni piviusuuvoq. Inuussutissarsiornerup iluani namminersortut ernumapput Kalaallit Nunaannilu aalisakkat amerlassusaannik ajalusoortoqarnissaa eqqartorneqartarluni. Folketingimi ilaasortap Aaja Chemnitz Larsenip politikkikkut akisussaassuseqarneq ujartorpaa.

Septembarimi Naalakkersuisut Qeqertarsuup Tunuani qaleralinniarnermut pisassaritinneqartut qaffappaat. Ippassaq marlunngornermi aalisarnermi Naalakkersuisup Jens Immanuelsenip qaleralinniarnerup qeqertap akornanni ingerlanneqartup nutaanik pisinnaatitsissummik tuninissaat unitsinniarlugu nalunaarpoq. Tamanna alloriarneruvoq eqqortuusoq. Taamaakkaluartoq Naalakkersuisut maanna pisinnaatitsissutaareersut killilerusunngilaat. Piffissami 2013-imit 2019-imut pisinnaatitsissutit Qeqertarsuup Tunuani 42%-imik qaffanneqarnikuupput.

”Erseqqarissumik oqassaanga; Naalakkersuisut politikkimik ingerlatsinerat piviusumik pisunik takunninnginnerullunilu akisussaanngitsumik ingerlatsineruvoq. Qasseriarluta tusartarparput saarullinnik qaleralinnillu amerlassutsit annikillisimasut. Taamaakkaluartoq Naalakkersuisut pisassarititat qaffattarpaat, isitit matullugit ajunngitsumillu neriullutik. Apererusunnarsisarpoq; Angakkuartutut imarput pissuseqarluni aalisakkanik nutaanik, angisuunik peqalissanerpa – imaluunniit sunaana neriuutigineqartoq?”, folketingimi ilaasortaq Aaja Chemnitz Larseni aperaaq.

Suut inuussutigissavagut?

Aalisarnermut atasinnaasumut oqallinnermi inuiaqatigiinni pisunut tunngaviusumik apeqquteqalersitsivoq: Suut inuussutigissavagut? Kinguaagut, meeqqagut ernuttagullu sunik kingornussassaqarpat? Qanorlu sivisutigisumik taamatut aalisartariaaserput ingerlanneqarsinnaava?

“Inuusugut pinngortitami inuullutalu inuussuteqartuulluta akisussaassuserput annaasimavarput. Tamanna saarullinnik qaleralinnillu ingerlatsinermut oqallinnerup takutippaa. Amerliartortut pinngortitamit pisaqarusuttarput pinngortitarli naammatsereerpoq. Oqaluttuarisaanitsinni ilikkarnikuugaluarparput allanngortoqarnissaanut piareersimajuaannartussaalluta. Tamanna tulluusimaarutigisinnaavarput. Aalisartunilli – pingaartumik umiatsiaaqqanik aalisartartut – 50%-imik ukiut ikitsut ingerlaneranni amerlisoqarsimanera atasinnaasumik ineriartortitsinermut iluaqutaanngilaq”, Aaja Chemnitz Larseni oqarpoq.

 ”Akisussaassuseqartumik aningaasaqarneq silatusaarnermit tunngaveqartussaavoq. Aalisarneq avammut tunisinitsinnut taama pingaaruteqartigippat pisassarititat qanoq inuussutissarsiornikkut aalisarnerup ineriartorneranut isornartorsiorpaluttumik sunniuteqarsinnaanersoq eqqarsaatigineqartariaqarpoq. Maannakkorpiaq aalisarpallaarujussuarneq unitsinneqartariaqarpoq. Siunissami aalisarneq atasinnaasumik ingerlanneqassaaq taamaaliornermilu aalisartut biologillu ilisimasaat aaliangiisuunerpaassallutik”, Aaja Chemnitz Larseni naggasiivoq.

Attavissaq: Aaja.Larsen@ft.dk imaluunniit +45 6162 4667.

Print Friendly, PDF & Email