Eskimologiimik unitsitsigallarnissamut Aajap naliliinera: Pingaarnersiuineq kukkulluinnartoq

Eskimologiimik unitsitsigallarnissamut Aajap naliliinera: Pingaarnersiuineq kukkulluinnartoq
Eskimologiimik unitsitsigallarnissamut Aajap naliliinera: Pingaarnersiuineq kukkulluinnartoq

18.01.16

Tusagassiutinut nalunaarut

Københavnip Universitetiani Arktiske Studiat ataanni Eskimologiimi ilinniagaqarnerup qanittukkut unitsinniarneqarneranut tunngatillugu Inuit Ataqatigiinneersup Aaja Chemnitz Larsenip kukkulluinnartumik pingaarnersiuinertut tamanna nalilerpaa. Det Humanistiske Fakultetimi dekanip ilinniagaqarsinnaaneq unitsinneqarallartoq Eskimologiimi atuartunut nalunaarutigaa. Aaja Chemnitz Larsenip (IA) taamatut aalajangiineq paasiuminaatsippaa, maannalu Ilinniartitaanermut Ilisimatusarnermullu ministerimut Esben Lunde Larsenimut (V) apeqquteqarluni.

“Kalaallit Nunaannut Issittumullu soqutiginninneq annertusiartortoq eqqarsaatigalugu Eskimologiimik Arktiske Studiamillu matusiniarneq pingaarnersiuinermi equngalluinnartutut isigivara. Ilinniakkani taakkunani ilisimasassat nutaat qulakkeerneqartarput issittumilu kulturimik paasinninnissamut pingaaruteqarlutik. Annikillisarnagit danskit-kalaallillu ilisimatusarnerni ingerlassaasigut annertusaasariaqarpugut, tassuunatigummi issittup inooriaatsillu paasilluarneqarnissaat qulakkeerneqarsinnaapput – soorlumi issittumi saniligut taakkunatigut annertusaasut. Eskimologii aamma Arktiske Studier fagiupput pingaaruteqartut, Kalaallit Nunaannuinnaanngitsoq aammali Danmarkimut. Eqqaamassavarpummi ilinniakkat taakkua asiamut ungasissorsuarmiittumut tunngasuunngimmata naak taakkua aamma pingaaruteqartuusut, tassaammatali Naalagaaffeqatigiinnermi pingaaruteqartuusut, taamaattumillu ilinniakkat matuneqassappata Kalaallit Nunaannut Danmarkimullu annaasaqaataasussat”, Københavnip Universitetiani Eskimologiimi Arktiske Studianilu ilinniartunik nutaanik unitsitsinermut tunngatillugu Aaja Chemnitz Larsen oqarpoq.

Tamanna pillugu Aaja Chemnitz Larsenip (IA) Ilinniartitaanermut Ilisimatusarnermullu ministeri Esben Lunde Larsen (V) ullumikkut isumakuluutiminut tunngasunik apeqquteqarfigivaa, tassa pingaarnersiuinermi tunulliunneqarnera nassuiaqquneqarluni, soorlu aamma folketingimi ilaasortaq ministerimut Københavnillu Universitetiani Det Humanistiske Fakultetiani Dekanimut Ulf Hedetoftimut toqqaannartumik allagaqarniartoq.

Folketingimut ilaasortap Aaja Chemnitz Larsenip Ilinniartitaanermut Ilisimatusarnermullu ministeri Esben Lunde Larsen (V) imaattunik apeqquteqarfigivaa:

– § 20 apeqqut: ”Naak ilinniagaq taanna danskit-kalaallillu ilisimasaasigut Issittumilu kulturitigut paasinninnissaasigut pingaaruteqartigisoq, pingaartumik maanna Issittup aatsaat taamak soqutigineqartiginerani, maanna 2016-imi Københavnip Universitetiani Det Humanistiske Fakultetiani Eskimologiimi Arktiske Studianilu ilinniartussanik nutaanik unitsitsiniarnermut Ilinniartitaanermut Ilisimatusarnermullu ministeri qanoq isumaqarpa?

-§ 20 apeqqut: ”Eskimologiip Arktiske Studiallu Kalaallit Nunaat Issittorlu pillugit ilisimasatigut ilisimatusarnikkullu pingaaruteqassusiannik, taamatullu Issittup Naalagaaffeqatigiinnermi pingaarutilittut akuuneranik Ilinniartitaanermut Ilisimatusarnermullu Ministeri isumaqataava?”

-§ 20 apeqqut: ”Kalaallit Nunaannut Danmarkimilu Issittumut tunngasutigut ilisimasanut nutaanut pilersitsinissamut Ilinniartitaanermut Ilisimatusarnermullu Ministeri siunissami pingaartitsinissamik isumaqarpa, aamma danskit ilinniagaqarfii ilanngullugit eqqarsaatigalugit? Taamaassimappat taamatut pingaartitsinissaq ministerip qanoq qulakkeerniarpaa?”

-GRU apeqqut: ”Eskimologiip aamma Arktiske Studiat Københavnip universitetiani “faginut mikisunut”, danskillu universitetiini fagitut humanistiskiusutut mikisutut aningaasanut inatsimmi immikkut qulakkiikkatut inissisimanerannik ministeri uppernarsaasinnaava? Taamaassimappat Eskimologiip Arktiske Studiallu siunissami aningaasanut inatsimmi naalakkersuisunit qulakkeerneqassanersut ministeri nassiuaateqarsinnaava?”

Attavissaq: Aaja.Larsen@ft.dk iml. +45 61624667.

del på de sociale medier

Del på facebook
Del på twitter
Del på linkedin