Aaja Inatsiseqarnermut ministerimut: Eqqartuussisoqarneq Kalaallit Nunaanni inuiaqatigiinni ineriartornermut nutaaliaasumut naleqquttuussaaq

Asseq: IA Folketingimi
Asseq: IA Folketingimi

Aaja Chemnitz Larsenip, Inuit Ataqatigiit folketingimi ilaasortap, ullumikkut inatsiseqarnermut ministeri, Søren Pape Poulsen, ataatsimeeqatigivaa, tassanilu Kalaallit Nunaanni inatsiseqarnermut tunngasut eqqartuiffigineqarput. Inatsiseqarnermut tunngasut suli danskit akisussaaffianniipput, tassanilu pineqarput eqqartuussisoqarneq, pinerlussimasunut isumaginnittoqarfik kiisalu Kalaallit Nunaanni politiit. Danskit naalakkersuisuisa naalakkersuisuunerminni isumaqatigiissummi siunniussatut allassimavaat, Kalaallit Nunaannut tunngasut suli akisussaaffigisatik Danmarkimisuulli pitsaatigilernissaat sulissutigineqassasoq.

Aaja Chemnitz Larsen oqarpoq: “Naalakkersuisut siunniussaminnut naapertuuttumik sulisariarput, inatsiseqarnikkullu inuiaqatigiinnik nutaaliaasunik qulakkeerinnillutik, pinerluffigineqartut ukkannerullugit pinerluttullu ukkanneqarajunnerusut ukkatinnginnerulaarlugit. Inatsiseqarnermut ministerip tamatumunnga isumaqataanera taamatullu inatsiseqarnermut tunngasutigut pitsanngorsaaqataarusunnera nuannaarutissaavoq.”

Inatsiseqarnermut tunngasutigut ingerlalluarneq, tassungalu eqqartuussisoqarneq ilanngullugu, Inuit Ataqatigiit isumaat naapertorlugu tassaavoq inuiaqatigiit naapertuuttumik ineriartornissaannut apeqqutaalluinnartut, taamaattumillu partiimiit inatsiseqarnermut tunngasut pingaarnertut suliniutigineqarput. Inuiaqatigiit kalaallit ineriartornerat ilutigalugu malittarisassat inatsisillu ineriartornermut tassunga tulluarsarlugit nutarterneqartarlutillu siunissamut qulakkeerinnittussaasut folketingimi ilaasortaq Aaja Chemnitz Larsen isumaqarpoq. Tamatuma saniatigut malittarisassat inatsisillu paasinartuussapput paasiuminartuullutillu, ataatsimullu isigissagaanni suliaqarfimmi tassani sulisut piginnaasamikkut qaffassarneqarnissaat pisariaqartinneqarpoq. Susassaqarfik taanna Kalaallit Nunaanni innuttaasut toqqissisimanissaannik naapertuuttumillu pineqartutut misigisimanissaannik qulakkeerinnittuussaaq. Inatsiseqarnermut tunngasut inunnut isumaginninnernut tunngasunut attuumassuteqarput, tamannalu kalaallit akisussaaffiattut inissisimavoq. Taamaattumik inuiaqatigiinni kalaallini pitsanngorsaassagaanni kalaallit danskillu oqartussaasuisa suleqatigiilluarnissaat aamma pisariaqarpoq.

Aaja Chemnitz Larsen Kalaallit Nunaanni inatsiseqarnermut tunngasutigut folketingimi tusarniaasoqarnissaanik sulissutiginnissimavoq. Tusarniaasitsineq marsip 22.-ianni pissaaq, saqqummiussisussallu tassaassapput Kalaallit Nunaanniit sulianut tunngasutigut ilisimasallit taamatullu ulluinnarni susassaqarfimmi tassani suliaqartuusut. Tusarniaasitsinermut atatillugu Aaja Chemnitz Larsen Kalaallit Nunaanni inatsiseqarnermut tunngasutigut politikkikkut siunnersuuteqassaaq, tassa pitsanngorsaatissanut Kalaallillu Nunaanni sulianut nukittorsaataasinnaasunut Inuit Ataqatigiit partiitut siunnersuuteqassallutik.

del på de sociale medier

Del på facebook
Del på twitter
Del på linkedin