Navigate / search

Ujartugaq: Kalaallit Nunaat pillugu ililsimasaqarnerunissaq

Asseq: Inuit Ataqatigiit Folketingimi

Ullumikkut danskit atuartitaanermut ministeriat Merete Riisager (LA) aamma folketingimi ilaasortaq Aaja Chemnitz Larsen (Inuit Ataqatigiit), atuartut qallunaaqqat Kalaallit Nunaannut tunngasutigut qanoq ilisimasaqartiginerat, qanorlu ilisimasaqarnerulersinneqarsinnaanerat pillugu ataatsimeeqatigiipput. 2018-imut aningaasanut inatsimmi apeqqutit aallaavigalugit immersuisitsinissamut 500.000 kr.-it immikkoortinneqarsimapput, apersuinermilu atuartut qallunaaqqat Kalaallit Nunaannut tunngasutigut ilisimasaannik paasisitsisoqassaaq. Misissuineq 2018-imi ukiakkut allarnisarneqassaaq.

Aaja Chemnitz Larsen oqarpoq: ”Misissuinermi inernerit atuartut qallunaaqqat Kalaallit Nunaannut tunngasutigut ilisimasaannik annertusaanissami toraartumik iliuusissiornissamut atorneqartariaqarput. Paasisitsinerunikkut Kalaallit Nunaannik taamaassorinninnernut tunngasut pinaveersimatittariaqarpagut – tassanilu qallunaaqqat apeqqutaalluinnarput.”

Ukiaq aningaasanut inatsimmut isumaqatigiinniarnerni apeqqutit aallaavigalugit immersuisitsinissamik kissaateqarneq Aaja Chemnitz Larsenimit saqqummiunneqarpoq.

”Kalaallit Nunaannik nutaaliaanerusumik paasissutissiinissarput qulakkiissavarput. Taamaattumik Kalaallit Nunaat pillugu atuartitsinissaq salliutinneqarnerussaaq, atuartitsissutissanullu naleqquttunut ullutsinnullu tulluuttunut suleqatigiittariaqarpugut.” Inuit Ataqatigiit folketingimi ilaasortaatitaat oqarpoq.

Marsip aallaqqaataani atuartitaanermut ministerimik Meter Riisagerimik aamma ilinniartitaanermut- ilisimatusarnermullu ministerimik Søren Pindimik isumasioqateqarnermi isuma tamanna nanginneqassaaq, tassanilu Danmarkimi Kalaallit Nunaat pillugu ilisimasaqartitsilerulernissami naalakkersuisut qanoq qulakkeerinnissinnaanerat eqqartorneqassaaq.

Isumasioqatigiisitsinissami apeqqutinut linki: http://www.ft.dk/samling/20171/almdel/GRU/samspm/E/index.htm

Print Friendly, PDF & Email