Navigate / search

Sarap inatsiseqarnermut ministeri inissiisarfiit pillugit isumasioqatigiilluni ataatsimiinnissamut aggersarpaa

Sarap inatsiseqarnermut ministeri inissiisarfiit pillugit isumasioqatigiilluni ataatsimiinnissamut aggersarpaa
Sarap inatsiseqarnermut ministeri inissiisarfiit pillugit isumasioqatigiilluni ataatsimiinnissamut aggersarpaa

Inatsisinik atortitsinermut ministeri Morten Bødskov (S) Sara Olsvigimit (IA) isumasioqatigiilluni ataatsimiinnissamut aggersarneqarpoq. Isumasioqatigiilluni ataatsimiinnermi sammineqassapput Kalaallit Nunaanni inissiisarfinni ammasuni pissutsit isornartut aammalu matoqqasumik paarnaarussivissamut piareersaatit. Isumasioqatigiilluni ataatsimiinneq pissaaq marlunngornermi 29. maj Christiansborgimi.

Sapaatip akunnerani tullermi marlunngorpat Folketingimi Kallallit Nunaat pillugu Ataatsimiititaliaq/Grønlandsudvalget aamma Inatsiseqarneq pillugu Ataatsimiititaliaq/Retsudvalget ataatsimoorlutik danskit inatsiseqarnermut ministeriat Morten Bødskov isumasioqatigiilluni ataatsimeeqatigissavaat. IA’p folketingimi ilaasortaatitaata Sara Olsvigip ministeri isumasoqatigiilluni ataatsimiinnermut aggersarpaa, tassanilu sammineqassapput Kalaallit Nunaanni inissiisarfinni ammasuni inissiisarfinni paarsisunut atugassarititat aamma matoqqasumik paarnaarussivissamut piareersaatit kiisalu inissiisarfiit pitsaassusaannik nalinginnaasumik eqqartuineq.

”Piffissami sivitsulersumi inissiisarfinniittunut inissiisarfinnilu sulisunut atugassarititagut ukkatarisimavagut. Nuannaarutigaara taamakku ukkatarineqalersimammata, kisianni aamma iliuuseqartoqartariaqarpoq. Isumasioqatigiilluni ataatsimiinnissamut siunertarivara, inatsisinik atortitsinermut ministerip ministeriaqarfiatalu ilisimaarilluinnassagaat, pissutsinik pitsanngorsaaniarluni sutigut iliuuseqartoqartariaqarnersoq”, Sara Olsvig oqarpoq.

Qaammatit kingulliit tallimat ingerlaneranni Sara Olsvig inissiisarfinni pissutsit pillugit apeqqutinik arlariinnik nassiussaqartarpoq, kingullertigullu piareersaatitut apeqqutit arfineq pingasut inatsisinik atortitsinermut ministerimut nassiunneqarput, neriuutigalugu isumasioqatigiilluni ataatsimiinneq sapinngisamik kinguneqarluartussamik inerneqarneqartitsiumaartoq. Ilaatigut Sara Olsvigip apeqqutigaa, inatsisinik atortitsinermut ministerip uppernarsarsinnaaneraa, inatsiseqarnerup iluani suliassat ingerlaavartumik Danmarkimi pitsaassutsimut naleqqussarneqassamaarnerat. Ilisimaneqarluarpormi inissiisarfeqarnerup tungaatigut pitsaassuseq Kalaallit Nunaanni Danmarkimilu assigiinngitsorujussuusoq.

”Kalaallit Nunaanni inissiisarfinnut marlunnut tamatumalu kingorna Herstedvesterimi paarnaarussivimmut pulaarninni uannut erserluinnarpoq, nunatsinni inissiisarfinni ammasuni innuttaasunut akuuleqqissitsiniaanermut suliffissaqartitsiniarnermullu periarfissat pitsanngorsaavigineqarnissaasa tungaasigut kivitsiniarluta annertoqisumik suliassartugut. Aaamma uannut erserpoq, sulisariaqalersugut matoqqasumik paarnaarussivissami pissutsinik pitsanngorsaaniarluta, tamakkuuppullu isumasioqatigiilluni ataatsimiinnissami oqaluuserisassatut inissikkusutakka”, Sara Olsvig oqarpoq.

Suliassaqarfinni assigiinngitsuni pitsanngorsaasoqassappat, suliassaqarfimmut aningaasanik immikkoortitsisoqartariaqarpoq. Sara Olsvig neriuppoq isumasioqatigiilluni ataatsimiinneq aqqutigalugu inatsiseqarnermut ministerip missingersuuteqarfigisinnaassagaa, kalaallinik inissiisarfimmi paarsisunik ilinniartitaanermik pitsanngorsarnissaa qanoq akeqassanersoq.

Suliassaqarfik pillugu suliaqarnerminut atatillugu Sara Olsvigip Kalaallit Nunaanni Illersuisut peqatigiiffiat aamma Pinerluttunik Isumaginnittoqarfik, Kalaallit Nunaanni Danmarkimilu Paarnaarussivilerisut Kattuffiat kiisalu suliassaqarfiup tungaatigut immikkut ilisimasallit assigiinngitsut ataatsimeeqatiginikuuai. Aammattaq Ilulissani, Nuummi Herstedvesterimilu inissiisarfinnut pulaarnermini sulisunik inissiisarfinniittunillu oqaloqatiginnippoq.

”Pulaaqattaarninni uissuummissutigivara Kalaallit Nunaanni Danmarkimilu sulisunut atugassarititat assigiinnginnerujussui. Paasinarpoq, inissiisarfimmi paarsisuulluni suliaq annertuujusoq piumaffiginnilttorlu, aammalu tamanut pitsaaqutaassaqisoq inissiisarfinni paarsisutsinnut ilinniartitaanerup atorfimmilu atukkat tungaasigut pitsanngorsaasoqarpat”, Sara Olsvig naggasiivoq.

Folketingip sulinermini ukiuata aallartinneraniilli Sara Olsvigip Kalaallit Nunaanni Pinerluttunik Isumaginninneq inissiisarfeqarnerlu pingaartitaqaralugit suliniuteqarfigivai, Grønlandsudvalgimullu innersuussutigivaa Kalaallit Nunaannut angalaarnissaminni inissiisarfiit sammisassanut ilaatinneqarnissaat.

IA’p siusinnerusukkut Folketingimi ilaasortaatitai taamatuttaaq ukiuni arlaqalersuni Danmarkimi inatsisinik atortitsinermut ministeriusartut kimigiiserfigisarpaat suliassaqarfiup tungaatigut pitsanngorsaasoqarnissaa anguniarlugu.

Sara Olsvigip inatsisinut atortitsinermut apeqqutaanut tamanut innersuussiffik uani takuneqarsinnaavoq. Isumasioqtigiilluni ataatsimiinneq ammasumik ingerlanneqassaaq.

Isumasioqatigiilluni ataatsimiinnermut innersuussiffik (qallunaatuinnaq):http://www.iafolketingimi.dk//news-justitsministeren+kaldes+i+samrad+om+forholdene+pa+de+gronlandske+anstalter.htm

§20-kkoortumik apeqqutinut innersuussiffik (qallunaatuinnaq): http://www.iafolketingimi.dk//news-sect20+sporgsmal+til+justitsministeren+om+hans+holdning+til+de+abne+anstalter+i+gronland.htm

Ataatsimiinnermut piareersaatitut apeqqutiut innersuussiffik (qallunaatuinnaq):http://www.iafolketingimi.dk//news-justitsministerimut+isumasioqatigiinnermi+apeqquteqaatit+arfineq+pingasut.htm

Print Friendly, PDF & Email