Navigate / search

Puisip amii nunatsinneersut Københavnimi sapaatip akunnermi atisanik takutitsinermi takutinneqartut

Puisip amii nunatsinneersut Københavnimi sapaatip akunnermi atisanik takutitsinermi takutinneqartut
Puisip amii nunatsinneersut Københavnimi sapaatip akunnermi atisanik takutitsinermi takutinneqartut

Copenhagen Fashion Week, ukiup affakkuutaartumik atisanik saqqummersitsinermik sapaatip akunneqartarneq uani sapaatip akunnerani Københavnimi ingerlanneqarpoq. Ukiormanna atisaliat ilaatigut puisip amiinik ilallit saqqummersinneqarput. Inuit Ataqatigiit Folketingimut ilaasortaatitaata Aaja Chemnitz Larsen-ip atisanik ilusilersuinermi puisip amii nunatsinneersut atorneqarnerat nuannaarutingaa.

Naluneqanngitsutut suliffeqarfik Namminersortunik pigineqartoq Great Greenland aningaasaqarnikkut ilungersunartumik inissisimavoq. Ungasinngitsukkut Great Greenland-ip Qaqortumi mersortarfini matusariaqarsimavaa, ilaatigut illoqarfiup iluani suliffissaqarniarnermut eqquisumik.

“Paasisinnaavara Great Greenland ukiunut arfinilinnut naammattunik puisip amiinik quersuarminiittuuteqarmat tunisinnaanngisaminik. Taamaammat nuannaajallannarpoq atisanik ilusilersuisartut Freya Dalsjø aamma Jesper Høvring puisip amii nunatsinneersut atisanik takutitsilluni nittarsaassinermi atormatigit. Puisip amiinik atuineq pitsaasumik ineriartortoq siammarterusunnaqaaq – aamma Danmarkip nunattalu avataanni. Puisip amiinik tunisisinnaaneq pitsaasumik ineriatoqqilerpat nunatsinni suliffissanik qularnaareqataassaaq, minnerunngitsumillu aamma piniartunut inuussutissarsiornikkut periarfissanik ammaasseqataassalluni” Aaja Chemnitz Larsen (IA) oqarpoq.

Great Greenland-ip aningaasaqarnerata qaqiseqqinnissaanut suliassat annertupput. Ilaatigut Aaja Chemnitz Larsen Great Greenland-ip pisortartaava Ditte Sorknæs februarip naanerani naapinnissaanut pilersaarusiorpoq. Naapeqatigiinnermi Aajap eqqartorneqartussatut kissaataasa ilangaat sutigut politik aqqutingalugu puisip amiinik tuniniaanermut periarfissanik pitsaasunik pilersitsisinnaanermut aqqutissat ingerlatiinnarneqarsinnaanersut. Suliaq Kalaallit Nunaanni, Danmarkimi minnerunngitsumillu EU-mi annertuumik ilungersuussamik suliassaavoq.

Aaja Chemnitz Larsen, EU-parlamentimi ilaasortat aammalu Inuit Sila peqatingalugit Danmarkip statsministeria kiisalu Naalakkersuisut siulittaasuat Kim Kielsen inassuteqarfingaat EU-mi qaammarsaanermut suliniutissatut siunniunneqarnikut malillugit sulianik ingerlatsisoqarneranik qulakkeerinninniaqqullugit. Tamanna pivoq 2008-mi puisip amiinik EU-mut eqqussequsiunnaarnerup kingorna, nunatta puisip amiinik avammut tuniniaaneranut millionikkaanik nalilimmik appariaateqarnermik kinguneqartitsisumik.

Print Friendly, PDF & Email