Navigate / search

Praktikkertut paarlaapput: Tukumminnguaq maannamut qujanaq Ulunnguarlu tikilluarli

Praktikkertut paarlaapput: Tukumminnguaq maannamut qujanaq Ulunnguarlu tikilluarli
Praktikkertut paarlaapput: Tukumminnguaq maannamut qujanaq Ulunnguarlu tikilluarli

Tukumminnguaq N. Olsen qaammatini kingullerni tallimani Christiansborgimi IA Folketingimip allattoqarfiani ilisimatuunngorniatut ilinniarnerminut atatillugu misiliummik suliffimmiippoq. Maanna suliffimmiinnera naammassivoq Tukumminnguarlu ullut 14-t qaangiuppata Nuummut utissaaq, tassanimi Ilimmarfimmi inooqatigiinnik ilisimatusarneq ilinniaragaa.

IA Folketingimiissimanini Tukumminnguup imatut oqaaseqarfigaa:

“Suliffimmik misiliinera uannut iluaqutaaqaaq. IA Folketingimi sulininni unamminartut nutaat, misilittakkat nutaat allatullu eqqarsartariaaseqarluni sulisinnaaneq pissariaqaatigaakka. Minnerunngitsumik politikkikkut sullissineq nuannareqaara suliffimmillu misiliinerma nalaani tigussaasumik sulineq misilittagaqarfigilerpara sullissinissaq atuagarsornerinnakkut ilinniaannarnagu. Upperilluinnarpara tamanna kingusinnerusukkut suliffittaarniarnissanni iluaqutigumaarlugu. Ataatsimut isigalugu oqartariaqarpunga suliffimmik misiliineq akissarsiartaqanngikkaluartoq, misigisarpassuarnik, misilittakkanik ilisimasanillu nutaanik pissarsiaqaatigigakku.”

IA Folketingiminngaannit Tukumminnguaq pitsaalluinnartumik sullissisimaneranut qutsavigaarput ingerlalluarnissaanillu kissaallugu. Ilutigisaanik tullinnguulluni praktikkertussarput Ulunnguaq Markussen tikilluaqqorusupparput. Ulunnguaq aamma Tukumminguatuulli Nuummi Ilimmarfimmi inooqatigiinnik ilisimatusarnermut ilinniartuuvoq.

IA Folketingimi suliffimmiinnissaminut neriulluaatini pillugit Ulunnguaq oqarpoq:

”Ilinniarnera aallartikkakkuli eqqarsaatigisarnikuuara nunatta avataani suliffimmik misileerusullunga. Soqutigisaralugu ilisimasaqarfiginerorusuppara Nunatta Danmarkillu akunnitsinni pissutsit, minnerunngitsumillu Nunatta inissisimanera silarsuarmioqatigiit Issittumilu suleqatigiinnerup iluani. Isumaqarpunga IA Folketingimi ilisimasanik misilittakkanillu katersiffigissallugu pitsaasuussasoq. Pissanngatigeqaara suliffimmik misiliinera sunik misigisaqarfigissanerlugu aammalu misilittakkat nutaat qanoq ittut praktikkernera naammassippat angerlaakkumaassanerlugit.”

IA Folketingimi qilanaaraarput ulluinnarni suliniavut Ulunnguamut ilisaritissallugit aammalu ukiup affaata tulliani pitsaasumik misiliilluni sulimminniinnissaanik iluarsartuussiffiginissaanut.

IA Folketingimi misiliummik suliffimmiinnissat soqutigigukku imaluunnit nalunngisaqaruit soqutiginnittumik uani paasisaqarfiginerusinnaavat :http://www.iafolketingimi.dk/praktikant.html

Print Friendly, PDF & Email