Navigate / search

Praktikkertut paarlaapput: Sebastian maannamut qujanaq Ortulu tikilluarli

Asseq: IA Folketingimi
Asseq: IA Folketingimi

Sebastian Lukas Bych ukiup affaani Chrstiansborgimi IA Folketingip allattoqarfiani qaffasissumik ilinniagaqartuusutut prakkertikkertuusimavoq. Maanna praktikkernera naammassivoq Sebastianilu Københavnip Universitetianut utissaaq, tassanimi Det Juridiske Fakultetimi inatsisilerituunngorniartuuvoq.

IA Folketingimi praktikkersimanini Sebastianip ima oqaasertalerpaa:

”IA Folketingimi praktikkernera assut nuannarisimavara. Kalaallit Nunaanni politikkinut tunngasortaanik ilikkagaqarneq assut pissanganarsimavoq, aammali Naalagaaffeqatigiinnerup iluani imminnut attaveqatigiinnerannut tunngasut malinnaavigalugit assut pissanganarsimapput. Praktikkerninni Issittoq pillugu Danmarkip illersornissamut nunanullu allanut tunngasutigut sulineranik paasisaqarluarsimavunga, paasisakkalu nunat tamalaat akornanni politikki pillugu siunissami suliaqarnissanni iluaqutigilluassavakka. Naggasiullugu suleqatigisimasakka pikkorissut inussiarnersullu suleqatigiilluarsimanitsinnut qutsavigerusuppakka.”

IA Folketingimiit Sebastianip naammaginarluinnartumik sulisimanera pillugu qutsavigaarput siunissamilu pitsaasunik kissaallugu. Peqatigitillugulu praktikantissarput nutaaq, Ortu Mørch Olsen tikilluaqqussavarput. Ortu Københavnip Universitetiani Eskimologi & Arktiske Studiani Kandidatinngorniartuuvoq, soqutigisaalu tassaapput issittumi inuiaqatigiinni pissutsit, ilaatigut Naalagaaffeqatigiinnerup iluani nuttarnernut tunngasutigut ilisimatusarnerit kiisalu piffissami nutaanerusumi issittumi sumiiffinni namminersortuni, soorlu Kalaallit Nunaanni, demokratiimik atuutsitsiartuaarnermut tunngasunik soqutigisaralugit.

IA Folketingimi praktikkernissamini naatsorsuutigisaminut tunngatillugu Ortu ima oqarpoq:

”Ilinnialeramali Kalaallit Nunaanni inuiaqatigiilerinermut tunngasunik sammisaqarnissara isumagisimavara. Kalaallit Nunaata Danmarkillu akornanni fagligemik ajornartorsiutitaqarsinnaasut soqutigivakka paasisaqarfigerusullugillu. Isumaqarpunga tamakkunuunatigut ilisimasaqalernissamut misilittagaqalernissamullu IA Folketingimi aqqutissaalluartoq. Praktikkernissanni pissarsiassakka naammassippallu ilikkagaqarfigisimasassakka assut pissanngatigaakka.”

IA Folketingimi suliassanut Ortup akuulernissaanut qilanaarpugut neriullutalu ukiup affaani uagutsinni praktikkerluarumaartoq.

IA Folketingimi praktikkernissannik soqutiginnikkuit, imaluunniit soqutiginnittumik nalunngisaqaruit, uani annertunerusumik paasisaqarsinnaavutit:http://www.iafolketingimi.dk/praktikant.html

Print Friendly, PDF & Email