Navigate / search

Inuit Ataqatigiit Folketingimi praktikkertumik taarsiissapput

Asseq: Inuit Ataqatigiit Folketingimi

Tukummimut qujanaq

August 2017-imili Tukummeq Riis Berthelseni Inuit Ataqatigiit Folketingimi ilisimatuutut praktikkertuuvoq. Piffissami tassani Folketingimi ilaasortaq Aaja Chemnitz Larseni ikiortarpaa ulluinnarnilu allaffeqarfimmi suliassanik ikiuisarluni. Piffissaq ingerlapallappoq ilisimatusarfimmilu semesteri nutaaq aallartingajalerpoq Tukummillu praktikkernera naangajalerluni.

Tukummeq misilittakkanik ulikkaarluni ilinniarfimminut Tværkulturelle Studier-imut Københavnip universitet-ianiittumut utissaaq: “Sulisaasermi piviusumik suliffimmik misiliineq pissanganarpoq suleqatigiinnilu anguniakkamik ataatsimik nakkussaqarneq pissanganarluni. Politikkimi soorlu suliassanik aaliangersimasunik suliaqarneq assersuutigalugulu Folketingimi allaffeqarfimmi suut suliarineqartarnersut paasisaqarfigalugit pissanganarlunilu nuannernikooqaaq”.

Upernaami maanna aggertumi immikkut Arktisk Råd-imi ilinniakkani peqatigiiffittut samminiarpaa specialiliassamini Kalaallit Nunaanni Danmarkimilu piorsarsimassutsikkut pissutsit allaaserinnginnerani.

Inuit Ataqatigiinnit Tukummimut suleqatigiilluarsimanermut qujarussutigerusupparput ilinniarneranilu ajunnginnerpaamik kissaassilluta.

Ukiumi/upernaami 2018-imi praktikkertussaq nutaaq

Inuit Ataqatigiit Folketingimit aamma praktikkertussarput nutaaq Sofie Kristianseni tikilluaqqorusupparput. Sofie Københavnip universitet-iani Eskimologi aamma Arktiske Studier ilinniarpai ilinniarnerminilu oqaatsit piorsarsimassusermilu paasinnittariaatsit Kalaallit Nunaannilu politikki immikkut pingaartillugit.

Sofie Inuit Ataqatigiit Folketingimi praktikkilernissaminut qilanaarpoq: “Politikkimut tunngasumi allaffeqarfimmi sulineq pillugu ilikkagaqarnissara qilanaaraara folketingimilu ilaasortap allaffeqarfiullu suleqatigiinneri takunissaanut qilanaarlunga. Takorloorsinnaavara ullut assigiinngissitaartuussasut qilanaaralugulu suliffeqarfimmi allanngorartumi ataatsimulli anguniagaqartumi sulinissara tamatta anguniagaqarfigisassatsinni sulinissaq qilanaaralugu – tassa Folketingimi Kalaallit Nunaat eqqartugassanngortinnissaa qilanaaralugu”.

Sofiap Christiansborg-imi maani ulluinnarni ilaasalernissaa qilanaaraarput qaammatinilu tulliuttuni suleqatigilluarnissamut qilanaarluta.

Illit aamma Inuit Ataqatigiit Folketingimi praktikkerfigalugu qanoq innersoq paasisaqarfigissallugu soqutigaajuk? Taamaappat nittartakkatsinni uani paasisaqarnerusinnaavutit: http://iafolketingimi.dk/gl/ia-folketingimi/praktikki/

 

Print Friendly, PDF & Email