Navigate / search

Issittumut isumannaatsumut anguniagassat qulit – Folketingimi Inuit Ataqatigiinniit 2019-ip tungaanut atuuttussamik illersornissakkut politikkitigut siunnersuut

”Illersornissakkut isumaqatigiissutissami ersarissumik oqariartuuteqarnissaq Kalaallit Nunaata pisariaqartippaa. Inuit Ataqatigiinniit kalaallit amerlanerujussuit Illersornissaqarfimmiinnissaat kissaatigivarput, taamaasiussagaannilu Kalaallit Nunaanni illersornissatigut ilinniarfeqarnissaq pisariaqarpoq. Upalungaarsimatitat nukittunerit pigilernissaasa ajutoortarnerillu pinaveersimatinnissaasa ukkanneqarnerusariaqarnerannik isumaqarpugut, Kalaallit Nunaatami isumannaannerunissaa anguniarparput”, folketingimi ilaasortaq Aaja Chemnitz Larsen siunnersuut nutaaq pillugu oqarpoq.

Inuit Ataqatigiit illersornissakkut politikkitigut siunnersuutaat ukiuni aggersuni Kalaallit Nunaata illersornissatigut suliassanik qanoq naammassinnissinnaaneranut partiimiit ataatsimut isigalugu pilersaarusiaavoq. Siunnersuummut aallarniisuuvoq Inuit Ataqatigiit Folketingimi, taamaattorli susassaqarfimmi tassani partiip tamakkiisup siunnersuutigivaa. Ullumikkut siunnersuutip saqqummiunneqarnerani Kalaallit Nunaanni illersornissaqarfiup sumiiffinniit peqataaffigineqarnissaa Aaja Chemnitz Larsenip pingaartillugu oqaatigivaa. Siunnersuummi anguniakkat ilaattut Kalaallit Nunaanni amerlanerit ilinniagaqartinnissaat illersornissaqarfimmilu atorfininnissaat saqqummiunneqarpoq, taamatuttaaq sumiiffikkaartumik misilittakkat piginnaasallu atorneqarsinnaanngorlugit nunatsinnilu illersornissaqarfik nukittorsarneqarsinnaanngorlugu Kalaallit Nunaanni inuinnaat illersornissakkut ilinniarfissaannik pilersitsinissaq saqqummiunneqarluni.

Illersornissatigut sumiiffiit peqataatinneqarnerunissaannut tunngatillugu inassuteqaatit pillugit Aaja Chemnitz Larsen oqarpoq: ”Illersornissaq kalaallini inuiaqatigiinni annertunerujussuarmik akuutinneqalissaaq. Taamaattumik inuinnaat kajumissutsimik aallaaveqartumik illersornissatigut ilinniarfissaannik pilersitsisoqassaaq, Illersornissaqarfimmimi kalaallit amerlanerugunik iluaqutaassapput, inusuttullu Illersornissaqarfimmi piginnaasaqalerunik iluaqutigisinnaavaat.”

”Issittumut isumannaatsumut anguniagassat qulit” uani atuakkit:Issittumut isumannaatsumut anguniagassat qulit

Print Friendly, PDF & Email