Navigate / search

Piviusorsiortumik politikkikkut ingerlatsigitsi – aatsaat taamaasiornikkut siunissami namminersulersinnaavugut

Namminersornerullutik Oqartussat nalaanni susassaqarfiit angerlaassimasagut tusiapittumik ingerlapput. Napparsimaveqarfimmi ikiorneqarnissaq ajornarneruvoq, meeqqat atuarfiat pitsanngorsagassaavoq naallu inunnik isumaginninneq politikkikkut aallunneqaraluaqaluni suli tusiapippoq. Tamanna tamatta ilisimavarput, unammilligassartaqarporlu. Peqatigitillugulu nunatsinni inuit ikiliartuinnarnerput aamma unammillernartuuvoq. Siunissami susassaqarfiit annertunerit amerlanerillu angerlaatissagutsigit susassaqarfiit pineqartut pitsanngorsarneqartariaqarput.

 

Nunanut allanut politikkip iluani sunniuteqarnerunissaq pillugu politikkitigut isumaqatigiissusiorsinnaalereersimavugut. Folketingimi Inuit Ataqatigiit kalaallit partiivinit kisiartaalluni Nunanut Allanut tunngasutigut Ataatsimiititaliamiippoq, tassanilu Kalaallit Nunaata nunanut allanut politikkimut tunngasutigut aalajangiiffigisassartai pingaaruteqartut eqqartorneqartarput aalajangiiffigineqarlutillu.

 

Inatsisinik atuutsitsinermut tunngasut Inuit Ataqatigiinniit pingaarnertut suliaqarfigaagut, ukiunilu Folketingimiissimanitsinni taamaattuarsimalluta. Susassaqarfik tamanna suli pingaartikkusupparput.

 

Susassaqarfiiit innuttaasunut tunngassuteqartut angerlaattariaqarivut isumaqarpunga, soorlu ataatassarsiunermi misiliutinut tunngasuni 1960’kkunili periutsit atorunnaarlugit Kalaallit Nunaannut nutaaliaamut tulluarsarlugit.

 

Tigusigasuarnissami periuseq, ’fast-track ordning’, pillugu Naalakkersuisut danskit naalakkersuisuinut pilertortumik isumaqatigiissusiornissaannut Inuit Ataqatigiinniit aqqutissiuisimavugut.

 

Kalaallit Nunaanni inuussutissarsiutitigut ingerlassallit nunanit allaneersunut tunngasuteqartut angerlaanneqarnissaannut ukiorpassuanngortuni utaqqiinnarsinnaanngillat. Nunaqqatitta ilinniagaqartinnissaasa saniatigut tamanna kalaallinut inuiaqatigiinnut iluaqutaasussamik qaffatsinnissamut aqqutissiuisuussaaq.

 

Ukiormanna Namminersulernitsinniit taamatullu Aatsitassanut imaanilu avatangiisitigut tunngasut angerlaannerinit ukiut qulit qaangiutissapput, pitsaanerusumik aningaasaqalernissatsinnut taamatullu susassaqarfiit amerlanerusut angerlaannissaannut pimoorussinngippallaarsimavugut? Tamatumunnga pilersaarut Inuit Ataqatigiinniit arlaleriarluta ujartortarsimavarput. Nunanit allaneersunut tunngasutigut susassaqarfik 2014-imili naalakkersuisooqatigiit isumaqatigiissutaanni Naalakkersuisuniit kissaatigineqarpoq, mannali tikillugu suli susoqarsimanngilaq.

 

Amerlaqaagut namminersulerusuttut, aamma Inuit Ataqatigiinniit tamanna kissaatigivarput, tamannali eqqarsaatigilluakkamik piviusorsiortumillu pissaaq – minnerunngitsumik iliuuseqartarnikkut.

 

Piffissami aggersumi Folketingimi sulinermi innuttaasut ulluinnarni inuunerminni malugisissaattut pitsanngorsaatissanut aallussiffigissavarput, imaanngitsoq pilersaarutinut piviusorsiunngitsut piffissaq atussagipput.

Print Friendly, PDF & Email