Navigate / search

Pituffik pillugu Folketingimi isumasioqatigiinneq: Inuit Ataqatigiit naammaginninngillat

Asseq: Inuit Ataqatigiit Folketingimi

Ullumikkut Nunanut Allanut ministeri Anders Samuelseni (LA) Pituffik pillugu isumasioqatigiittarnerit ilallugit Folketingimi isumasioqatigiinnissamut qaaqqusivoq. Pituffimmi radarip nutarterneqarnissaa oqaluuserisassaniippoq, soorlu aamma Kalaallit Nunaata, Danmarkip USA-llu suleqatigiinneranni killiffissiuinissaq Kalaallit Nunaannut tunngasutigut ataatsimiititaliamit kissaatigineqartoq. 2014-imiilli Inuit Ataqatigiinni Folketingimiit Pituffimmut tunngasoq qanimut malinnaavigineqarpoq, taamaattumillu folketingimi ilaasortaatitaq Aaja Chemnitz Larsen ullumi matoqqasumik isumasioqatigiinnermittaaq peqataavoq.

2017-imi upernaakkut amerlasuunit tupaallaatigineqartumik USA-p Pituffimmi radari milliardit kuartiat atorlugu nutarternialersaaleraa paasineqarpoq. Danmarkip, Kalaallit Nunaata USA-llu Igalikumi isumaqatigiissutaat naapertorlugu Pituffimmi annertunerusumik nutarterisoqassatillugu Danmark aamma Kalaallit Nunaat saaffigineqartussaapput. Ullumikkullu radarip nutarterneqarnissaanut atatillugu danskit naalakkersuisuisa qanoq atuuffeqarnerat pillugu Nunanut Allanut ministeri nassuiaateqarpoq.

”Pituffimmi pisunut atatillugu oqaloqatigiinnerup taamaannera naammaginanngilaq. Kalaallit Nunaata soqutigisai Folketingittaaq aqqutigalugu isumaginiassagutsigit, ullumikkorniit ammanerusumik pissusilersortoqartariaqarpoq. Igalikumi Isumaqatigiissut illersornissallu iluani isumaqatigiissutit allat isumaqatigiissutaapput pingaarutillit. Tassanilu oqaloqatigiinneq diplomatiskiusumillu suleriarsinnaaneq apeqqutaapput. Taamaattumillu nunatsinni Naalakkersuisut danskillu naalakkersuisuisa nunatsinnut iluaqutaasussamik amerikkarmiunik oqaloqateqarnerunissaat naatsorsuutigaara.” isumasioqatigeereernermi Aaja Chemnitz Larsen oqarpoq.

Taamatuttaaq Folketingimi ilaasortaatitamit Pituffimmi kiffartuussinissamik isumaqatigiissut apeqqutigineqarpoq. Amerikkarmiut Kalaallit Nunaanniinnerannut isumaqatigiissut naapertorlugu suliassaqarfinnut isumaqatigiissutit sapinngisamik ingerlatsivinnit danskinit kalaallinillu pigineqartunit isumagineqartussaapput, taamaattumillu kiffartuussinissamut imaatigullu assartuussinissamut isumaqatigiissutit amerikkarmiut ingerlatsiviinit isumagineqartussanngortinneqarnerat tupigusuutigineqarpoq. Isumaqatigiissut tulleq suliariumannittussarsiorneqartussaq tassaavoq Pituffimmut timmisartuussinermut tunngasoq ullumikkullu Air Greenlandimiit isumagineqartoq.

Aaja Chemnitz Larsen oqarpoq: ”Ajoraluartumik Pituffimmi kiffartuussinissamut isumaqatigiissutit maannakkut kalaallinut/danskinut isumagineqartussanngortinneqaratik amerikkarmiunut tunniunneqartalerput. Tamanna Pituffimmi kiffartuussinissamik isumaqatigiissutip saniatigut aammattaaq Pituffimmiit/-mut imaatigut assartuussinermut atuuppoq, allaat amerikkarmiut neqeroorutaat RAL-ip neqeroorutaanit marloriaataanik sinneqartumik akisunerugaluartoq. Aappaagu timmisartuussineq pineqassaaq, tassanilu maannangaaq Kalaallit Nunaata soqutigisai qulakkeertariaqarpagut. Pituffimmi kiffartuussinissamut isumaqatigiissutit amerikkarmiunut tunniunneqartarneri Illersornissamut Isumaqatigiissutip siunertaanut uniuinerupput. Taamaattumik isumaqatigiinniarnissani massakkullu isumaqatigiinniarnerni Kalaallit Nunaata inissisimalluarnissaanut Folketingip danskit kalaallillu naalakkersuisuinut uteriisertuarnissaa uanni pingaaruteqarpoq”.

Oqaluuserisanut linki, isumasioqatigiinnermilu apeqqutit:  http://www.ft.dk/samling/20171/udvda/GRU/1450181/index.htm

Print Friendly, PDF & Email