Navigate / search

Partiip oqaaseqartartuatut oqaseqaat Naalagaaffeqatigiinnermi sakkutuujusussaanikkut naligiinneq pillugu

Asseq: Inuit Ataqatigiit Folketingimi

Qujanaq oqaaseqarsinnaagama.

Ukiuni aggersuni Kalaallit Nunaanni Illersornissamut tunngasut qanoq aqunneqarnissaannut qanorlu nukittorsarneqarnissaannut Inuit Ataqatigiit ersarissumik isummersuuteqarput. Ullumikkumut naleqqiullugu Kalaallit amerlanerusut illersornissaqarfimmi sulianut peqataanissaat Inuit Ataqatigiinniit kissaatigivarput. Tamanna amerlasuutigut pisinnaavoq, soorlu kajumissutsimik aallaaveqartumik peqataatitsinikkut kalaallillu Illersornissaqarfimmi ilinniagaqarusuttut atorfeqarusuttullu periarfissarissaartinnerisigut. Isumaqanngilagut sakkutuujusussaatitaaneq eqqunneqassasoq, allatigulli inuiaqatigiit kalaallit peqataasinnerulersinneqarsinnaapput.

Politikki isigalugu illersornissakkut isumaqatigiissutitigut isumaqatigiinniarnissani aggersuni Kalaallit Nunaat sinniisuutitaqassasoq isumaqarpugut, taamaasillutalu Kunngeqarfiup Illersornissakkut- Sillimaniarnikkullu ataatsimut politikkiani Kalaallit Nunaata tusaaneqarnissaa qulakkeersinnaavarput. Kalaallit Nunaanni Illersornissaqarfimmi aningaasat sapinngisamik atorluarneqarnissaat eqqarsaatigalugu ilisimasat qulakkeerneqarnissaat tamanut iluaqutaassaaq. Aamma Danmarki Naalagaaffeqatigiit sinnerlugit sorsuttunut akulerukkaangata Inatsisartut tusarniarneqartarnissaannik isumaqarpugut.

Ullumikkut Kalaallit Nunaat sinnerlugu danskit naalagaaffiata Illersornissamut- Sillimaniarnissamullu politikki isumagisarivaa. Tamanna Namminersornermut inatsimmi 2009-meersumi ilanngussatut ersarissumik allassimavoq. Kalaallit Nunaat eqqissinermik kissaateqartuuvoq Issittumilu nunat saqitsaaffiunnginnissaannik attassiinnarusuttuulluni. Tamannaavoq Kalaallit Nunaata Inuit Ataqatigiillu ersarissumik siunnerfiat. Issittumi pissanganartorsiortitsinernik ileqqoqaratalu annertusaanissamik kissaateqanngilagut.

Taamaattumillu illersornissaqarfimmi inuinnaat suliatigut naammassisinnaasaat Kalaallit Nunaatalu oqartussaasuuneranik illersorneqarnissaanik sulissutiginninneq ukkanneqartariaqarput. Imaatigut ilaatigut pineqarput sikunik aserorterutit, imaatigut isumannaatsuuneq kiisalu SAR (annaassiniartarnerit), tassa 3 sømilit iluanni avataannilu Politiit suleqatigineqartarfianni. Nunakkut najugaqartuusut takornarissallu amerliartortut avatangiisinillu killeqartumik ilisimasarlutik pinngortitamiittartut toqqissisimasunik atugaqarnissaannik qulakkeerinninnissaq pineqarpoq. Silaannakkut Kalaallit Nunaata alapernaarsorfiginissaa oqartussaasuunerullu illersorneqarnissaanik qulakkeerinninnissaq pineqarput.

Peqatigitillugu Issittumi ineriartornermut piareersimanissaq malinnaanissarlu Inuit Ataqatigiinniit pingaartippagut. Taamaattumik Arktisk Kommandop suliassaataanut kalaallit peqataatinneqarnerunissaat

Inuit Ataqatigiinniit aallussimavarput. Ilaatigut kajumissutsimik aallaaveqartumik upalungaarsimasoqarnissaq sulissutigisimavarput, tassa kalaallit kangerlunneereersut ilisimalluakkaminnilu pinngortitameereersut atorneqarnissaat eqqarsaatigalugu. Kalaalerpassuit umiatsiaqarput, snescootereqarput imaluunniit ATV-qarlutik. Amerlasuullu ilisimasaminnik tunniusserusuttuupput. Ullumikkullumi amerlaqisut ikiuuttarput.

Ullumikkut Arktisk Kommandomi kalaallit ikittuinnaat atorfeqarput. Tamannalu allanngortariaqarpoq. Taamaasiornissamilu sakkutuujusussaatitaaneq eqqunneqartariaqanngilaq. Illersornissaqarfiup Ullormi paasissutissiiviani kalaallit inuusuttut Illersornissaqarfimmiit pilerisaarneqarsinnaapput. Taamaattumik inuinnut kajumissutsiminnik Illersornissaqarfimmi peqataarusuttunut periarfissiinissaq pineqarpoq. Nunarujussuarmi ingerlassinermut 500 kr. –it naammanngeqqajartut nalunngilarput.

Nammineq isumaga naapertorlugu Kalaallit Nunaanni pisariaqartinneqartut aallaavigalugit illersornissaqarfimmi piginnaasaqalersitsinissaq pingaaruteqarpoq. Sermersuarmi 30-nik issittumi suliaqarneq Danmarkimi nunaammi imaluunniimmi Kangiani Qiterlermi sorsuffiusumi suliaqarnertut assersuunneqarsinnaanngilaq. Kalaallit Nunaanni Issittumilu iliuusissat Kalaallit Nunaannut Issittumullu tunngasuullutillu ineriartortinneqassapput. Sungiusarneq nunami piginnaasat atorneqarfigisinnaasaanni pisassaaq. Illersornissatigut isumaqatigiissummi ukiorpassuarnilu atuuttussami tamatuma qulakkeerniarnissaanut politikkikkut sunniuteqarsinnaanerput ataatsimoorluta atortigu.

Siunnissaq eqqarsaatigalugu Illersornissatigut suliassatigut Kalaallit Nunaanni oqallinnissamik pisariaqartitsivugut. Taamaattumik upernaaq manna Inatsisartut ataatsimiinneranni Inuit Ataqatigiinniit oqallisissiatut siunnersuuteqarsimavugut. Oqallinnerup tamatuma Kalaallit Nunaannittaaq pinissaa pingaaruteqarpoq.

Taamaattumillu Alternativet peqatigalugit Kunngeqarfiup ataatsimoorussatut illersornissamut- sillimaniarnermullu politikkianut tunngatillugu Kalaallit Nunaanni illoqarfiit arlallit innuttaannik sociale mediatigullu peqataatitsilluta oqalliffiit ”politik-mik” taaguutillit aaqqissuussimavagut.

Oqallinnissaq qilanaarivara – taamatullu Folketingimi politikkikkut illersornissami isumaqatigiissummut isumaqatigiinniarnissamut ukiamut pisussamut qilanaarpunga.

Qujanaq.

Print Friendly