Navigate / search

Oqartussaasuunermut akiliut pissutsinik piviusunik ersersitsissaaq

Ilaannikkooriarlutik Dansk Folkeparteermiut susassaqarfinnik angerlaanneqareersunik atorunnaarsitseqqusisarput, assersuutigalugu inunnut isumaginninnermut tunngasutigut. Dansk Folkeparteermiut Kalaallit Nunaata Namminersortuunera akuerinngisaannarsimavaat, taamanikkullu tamanna Folketingimi isumaqatigiinniutigineqarmat akersuussimallutik, sulilumi ullumimut taamaallutik.

Kalaallit Nunaat naalagaaffiunngimmat Danmarki oqartussaasutut ukiumooortumik tapiissuteqartarpoq. Taamatut oqartussaaffeqarneq akiliuteqarnikkut ersersinneqartariaqarpoq, Kalaallit Nunaammi Danmarkimut iluaqusiisuuvoq.

Kalaallit Nunaannut namminersortumut ataqqinninneq taamatullu Danmarkimik naligiinnerusumik peqateqarnissamik kissaateqarneq Inuit Ataqatigiinni qitiuvoq. Namminersortuuneq uninngaannartuunngilaq, isumaqassagunili ineriartorfiulluartuusariaqarluni. Taamaannerani Kalaallit Nunaata Danmarkillu akunnerminni atuuffii imminnut tulluarsartuartariaqarput, Kalaallit Nunaatalu ineriartornissaa inissaqartinneqarluni.

Naalagaaffiup tapiissutaanik oqartarnermut taarsiullugu oqartussaasuunermut akiliutinngortikkaanni, Danmarkip nunanut allanut tunngasutigut sillimaniarnikkullu politikkitigut pingaaruteqarnerulerneranut Kalaallit Nunaata patsisaanera ersersinneqassaaq.

 

Kalaallit Nunaat Naalagaaffeqatigiinni akuunngikkaluarpat Danmarki nunaarannguatut nunani tamalaani niuernikkut naalagaaffissuarnillu, soorlu USA-mik, Kinamik Ruslandimillu peqateqarluni nunanut allanut tunngasutigut sillimaniarnikkullu politikkitigut suleqatigiinnut taamatut akuutigissanngikkarluarpoq kiisalu Issittumi pissaanilissuartut inissisimassanngikkaluarluni.

 

Kalaallit Nunaat Danmarkimut pingaaruteqaqaaq annertunerulersitsillunilu nunanut allanut akuunerulersitsilluni. Tamanna pillugu Danmarkip Kalaallit Nunaannut ataqqinninnini takutittariaqarpaa.

Taamatuttaaq naligiittumik Danmarkimik suleqateqarnissaq Kalaallit Nunaata massakkorpiaq pisariaqartippaa. Danmarkimik suleqateqarluaraanni Kalaallit Nunaat illersorluarneqarnerussaaq nunanullu allanut toqqissisimanartumik annertusisamillu periarfissikkaanni siuarsarnissatigut aningaasatigullu pitsanngorsaanissatigut annertusaassalluni.

Taaguutit atukkagut aqqutigalugu silarsuarput paasisarparput. Taamaattumillu Inuit Ataqatigiinniit isumaqarpugut qanga naalagiiffiup iluani amtitut kommunitullu pinninnerup nalaanisut naalagaaffiup tapiissutaanik oqartarneq ullumikkut allatut isumaqalersimasoq, tassalu oqartussaasuusermut akiliutitut paasillugu. Danmarki Kalaallit Nunaannut oqartussaasuunissamini akiliuteqassaaq, akerlianillu nunanut allanut tunngasutigut politikkitigut inissisimanerminik annertusitsillunilu nukittortitsilluni, imminut paasinermigut nunallu tamalaat akornanni paasineqarnermigut. Tamanna pissutsinik piviusunik ersersitsissaaq.

Print Friendly, PDF & Email