Navigate / search

Kiisami: Maanna kalaallit biilernermut allagartallit danskit allagartaannut taarsiisinnaanerat ajornannginnerulerpoq.

Asseq: Inuit Ataqatigiit Folketingimi

2019-imi juulip aallaqqaataaniit Kalaallit Nunaanni biilertartut biilernermut allagartatik aallaavigalugit danskit biilernermut allagartaannik pissarsisinnaanerat ajornannginnerulerpoq. Tamanna Aaja Chemnitz Larsenip ukiuni arlaqalersuni sulissutigisimavaa, maannalu iluatsippoq. Danskit Naalakkersuisuisa maanna inatsit allanngortissavaat.

Folketingimi ilaasortaq oqarpoq: ”Kalaallit biilernermut allagartaasa danskit allagartaannik taarserneqarsinnaanerat amerlasuunit ujartorneqartarsimavoq. Maanna inatsisit atuuttut aporfissaqartitsineranni Naalagaaffeqatigiinnermi suli aporfik ataaseq peerneqarpoq, tamannalu nuannaarutigaara.”

Ullumikkut kalaallisut biilernermut allagartaq ulluni 90-ini Danmarkimi atorneqarsinnaavoq. Taannalu danskit biilernermut allagartaannik taarserniaraanni biilernermut akunnerni marlunni ilitsersorneqarnissaq misilitsinnissarlu pisariaqarput. Tamannalu danskit Naalakkersuisuisa maanna allanngortinniarpaat, imaalillugu aatsaat nammineq piumagaanni ilitsersorneqarnissaq misilitsinnissarlu qinerneqarsinnaasut.

Print Friendly, PDF & Email