Navigate / search

Kalaallit politiivisa atorluarneqarnerulernissaat

Politiit iluanni suliassanik tulleriiaarineq pitsaanerusoq nukinnillu atuilluarnerunissaq pisariaqartinneqangaarput. Peqatigitillugulu kalaallit politiivisa sulinerminni atugaat pitsanngorsarneqassapput. Taamaattumik IA-p folketingimut qinigassanngortitaa Aaja Chemnitz Larsen politiit sulineranni pitsanngorsaatissanik tigussaasunik arlalinnik siunnersuuteqarpoq. Siunnersuutigivai:

 

  • Kalaallit politiivi inissiisarfinnilu sulisui Danmarkimi suleqatimittut akissaateqartinneqalissasut
  • Biilinik nalunaarsuineq politiit suliaanniit innuttaasunut kiffartussivimmut nuussasoq
  • Pas-itaartitsisarneq innuttaasunut kiffartuussivimmut nuussasoq
  • Ataataasutut nalunaartarneq aallaaviattut napparsimmavimmit innuttanullu kiffartuussivimmit isumagineqartassasoq

 

”Kalaallit Nunaanni pinerlunnerit inunnik ulorianartorsiortitsisut Danmarkimut sanilliullugit 34-eriaammik amerlanerupput. Politiigulli Danmarkimi suleqatiminnit annikinnerujussuarmik akissaateqarput. Tamanna naapertuutinngilluinnartuuvoq, nammineq nalilersussagaanni aammalu sulinermi atukkat eqqarsaatigalugit. Sulisussanik pissarsiniarnerit sulisunillu tigumminniinnarnissat ajornarnerulersarput, massa akerlianik pisariaqartitsisoqaraluartoq”, Aaja Chemnitz Larsen.

 

”Politiini inissiisarfinnilu sulisut atorfinni sakkortuuni annertuunik akisussaaffeqarput. Soorunami suli Naalagaaffeqatigiinnut akuutilluta inatsisinillu atuutsitsinermut akisussaaffik suli angerlaassimatinnatigu Danmarkimi suleqatinit annikinnerusunik akissaateqartinneqassanngillat. Naligiinnissaq pineqarpoq. Aammalu sulisussaqarnissat sulisunillu tigumminniinnarnissat pineqarput.”

 

Aajalu nangippoq:

”Peqatigitillugulu politiigut politeeqarfinnilu sulisugut allat ajornanngitsuaqqamik suliarisinnaasaannik, assersuutigalugu innuttaasunut kiffartuussiviit, allaffissornikkut suliassaqarput. Siunissami pas-itaartitsisarnerit, biilit nalunaarsorneqarnerini pappilissatigut suliassat ataataasutullu nalunaarutiginninnerit inuinnarnut sullisivinnit suliarineqarsinnaapput. Taamaasillutik suliassat taamaattut politiit suliassaannit nuunneqartariaqarput, politiillu suliassavimminnut innuttaasunullu pisariaqartitsisunut ikiuunnissaminnut nukissaat annertusarlugit. Isumaqarpunga tamanna salliutittariaqaripput sulissutigalutigulu.”

 

Taamaattumik Aajap Inatsisinut Atuutsitsinermut ministeri, Søren Pape Poulsen, tamanna pillugu apeqquteqarfigisimavaa. Pitsanngorsaatissatut tigussaasutut assersuutaasinnaavoq biilisigutta sumut aalajangersimasumut saaffissaqarnissaq. Ullumikkut Politiit Akileraartarnermullu Aqutsisoqarfik saaffigineqartarput, nummerpladenullu nalunaarsuiffik Akileraartarnermut Aqutsisoqarfimmut nuussinnaagaanni, tamanna innuttaasunut oqilisaataassaaq.

Print Friendly, PDF & Email