Navigate / search

Kalaallit Nunaanni Politiinut qaangiuttoornersiutit akilerneqartalernissaat isumannaatsuunerunerlu

Asseq: KALAALLIT NUNAANNI POLITIIT

Rigspolitiit Inatsisinik Atuutsitsinerup ataaniittut qanittukkut nalunaarutigivaat Danmarkimi politiit qaangiuttoornernut aningaasarsinissanut periarfissaqalissasut. Taamaattumillu Inuit Ataqatigiinniit Folketingimi ilaasortaatitap Aaja Chemnitz Larsenip justitsministerimut qaangiuttoornersiutit akilerneqartalernissaat aamma Kalaallit Nunaanni politiinut atuunnersoq apeqqutigivaa. Justitsministerip akissutaa pitsaasuuvoq.

”Politiit inuiaqatigiinni pingaarutilimmik suliaqartuupput. Naalagaaffeqatigiinnilu tamani politiit naammaginartunik suliffimminni atugaqarnissaat, taamatullu sulinerminnut akilerneqartarnissaat pissusissamisoorpoq. Danmarkimi qaangiuttoornersiutit akilerneqartarnissaannik ammaassisoqarpat, taava Kalaallit Nunaanni atukkatigut ilungersunartorsiorfiusumi taamatut pisoqarnissaattaaq nuannaarutigaara.” Aaja Chemnitz Larsen oqarpoq.

Kalaallit Nunaanni inatsisinik atuutsitsinermut tunngasut Inuit Ataqatigiinniit piffissami sivitsortumi immikkut aallussimavagut. Danskit naalakkersuisuisa Kalaallit Nunaanni akisussaaffinni tigummiaminni danskisuulli atugaqalernissaq anguniagaraat. Taamatullu 2018-imut aningaasanut inatsisissatut siunnersuummi inatsisinik atuutsitsinerup nukittorsarneqarnissaanut naalakkersuisuniit 40 mio. kr.-it immikkoortinneqarsimapput.

Aaja Chemnitz Larsen itisiliivoq: ”Aningaasarsiatigut suliffimmilu atukkatigut pissutsit saniatigut Kalaallit Nunaanni Politiinut isumannaatsuunissaq pingaaruteqarpoq. Radiokkut attaveqaqatigiinnermi atortunut nutaanut aningaasaliisoqarnissaa sulissutigaara, taakkualu 10-35 mio.kr-eqassapput. Isumannaatsuunerup annertusarneqarnissaanut tamanna pingaaruteqartuuvoq, tassami Politiit pisuni ulorianartorsiorfiusuni pigajuttuni ikiortissarsiornissaminnut periarfissaqalissammata. ”

Justitsministerip akissutaa uani takujuk: http://www.ft.dk/samling/20171/almdel/reu/spm/191/index.htm

Print Friendly, PDF & Email