Navigate / search

KALAALLIT NUNAANNI INATSISINIK ATTUUTSITSINEQ – PITSAASSUSEQ NALEQQUTTOQ?

Advokaten, 29. januar 2018

Oqallissaarut saqqummernikuvoq Advokaten-imi, 29. januar 2018

AAJA CHEMNITZ LARSEN, CAND. SCIENT. ADM., FOLKETINGIMI ILAASORTAQ, INUIT ATAQATIGIIT

Kalaallit Nunaanni inatsisinik atuutsitsinermut tunngasut qaffatsissagutsigit naalakkersuinikkut suli pitsanngoriarfissaqarpugut. Qallunaat tassuunatigut killiffiat qimerloorutsigu suli aqqutissaq takivoq, folketingimi ilaasortaq Aaja Chemnitz Larsen, Inuit Ataqatigiinneersoq, oqarpoq.

Kalaallit Nunaanni Namminersorlutik Oqartussat pillugit inatsisaat 2009-meersoq naapertorlugu ilaatigut inatsisinik atuutsitsinerup iluani danskit tassuunatigut atugaannut naleqqersuunneqarnissamik qulakkeerinninnissaq PINGAARUTILITTUT ANGUNIAGAAVOQ.

Namminersorlutik Oqartussat inatsisaat, kalaallit susassaqarfinnik qallunaatut pitsaassuseqalersimappata tigusisinnaanerannik periarfissiivoq. Danskit naalakkersuisuisa naalakkersuisuunerminni toqqammavigisaanni novemberimi 2016-meersumi, Namminersorlutik Oqartussanisuulli susassaqarfinni danskit akisussaaffigisaanni danskisut pitsaassuseqalersitsinissamik anguniagaqartoqarpoq.

Naak Kalaallit Nunaanni inatsisinik atuutsitsineq danskit akisussaaffigigaluaraat, kalaallit danskillu oqartussaqarfiisa suleqatigiilluarnissaat oqaloqatigiinnissaallu apeqqutaapput. Inatsisinik atuutsitsinermut susassaqarfiup angerlaannissaa qanittumi ilimanaateqanngilaq. Kalaalliniit isigalugu Pinerluttunut Isumaginnittoqarfimmut, politiinut eqqartuussiveqarfimmullu tunngasut akisussaaffiupput annertungaartut. Taamaakkaluartorli kalaallinut inuiaqatigiinnut inatsisitigut isumannaatsuunissap naleqquttumik pitsaassuseqarnissaanut Kalaallit Nunaat Danmarkilu soqutigisaqartariaqarput. Inatsisinik atuutsitsinermut tunngasutigut ingerlalluarneq inuiaqatigiinni atugarissaarfiusuni pingaarutilittut toqqammaviuvoq, inuiaqatigiillu ineriartortinneqarnissaanni peqataatinneqartussaalluni.

Ukiuni kingulliunerusuni oqartussat susassaqarfimmilu akuusut akornanni oqallinneq annertusiartorsimavoq. Kattuffinnit arlalinniit, Ilaatigut Advokatsamfundimiit kiisalu Inuttut Pisinnaatitaaffinnut Institutimiit, Kalaallit Nunaanni inatsiseqarnermut atuutsisinermut tunngasut isornartorsiorneqarsimapput. Kalaallit Nunaannilu Naalakkersuisut novembarimi 2017-mi inatsisinut atuutsitsinermut tunngasut pitsanngorsarneqarnissaannut kissaatinik arlalissuarnik tunniussaqarput.

Kalaallit Nunaanni Danmarkimilu oqartussaqarfiit attuumassuteqartut, Kalaallit Nunaanni inatsisinik atuutsitsinerup iluani ineriartortitsinissap sammivissaanut neriuginartumik isumaqatigiissinnaajunnarput.
Kredsrettit imminnut ungasinnerisa, tassa timmisartunngikkaanni umiatsiamilluunniit sivisuumik angalanngikkaanni tikeriaannaannginnerisa, professionalimik oqimaaqatigiissumik sulisinnaanikkut sumiiffinnilu sulisunik atuisinnaanikkut unammilligassaqartitsisarput.

Kalaallit inatsisinik atuutsitsivianni qanimut sullissineq tunngaviusimavoq, ilinniartitaanikkulli, ilinniaqqitsitaanikkut sulisunillu pikkorissunik tigumminniinnarnissamut tunngasutigut naalakkersuinikkut annertusiartortumik piumasaqaateqartoqartalerpoq. Inuiaqatigiit ineriartornerat naapertorlugu Kalaallit Nunaanni inatsisinik atuutsitsinermut tunngasutigut sullerissunngortitsinerunissaq qulakkeerniarlugu professionalinngortitsiniarnissaq pissusissamisoorpoq. Peqatigitillugulu susassaqarfimmi tassani atuulluareersut tigummiinnarneqassaapput, akuulersitsinermut tunngasut ilanngullugit.

Kalaallit inatsisinik atuutsitsiviat inuiaqatigiinnut toqqissisimanermik inatsisitigullu isumannaatsuunermik isumaginnittuuvoq. Politiini, Pinerluttunik Isumaginnittoqarfimmi eqqartuussiveqarfimmilu arnat angutillu pikkorissut sullipput ulluinnarnilu toqqissisimanissamik annertuumik isumaginnittuusarlutik. Susassaqarfimmi tassani ilaatigut sulisutigut qaffasissumik piginnaasaqartitsinikkut taamatut ingerlaarneq pitsanngorsarniarlugu naalakkersuinikkut tapersersuisoqassaaq. Qaffasissuserli annertusassagutsigu politikkikkut suli pikkorinnerusariaqarpugut.

Pitsaassuseq qallunaanut naleqqiullugu misissuataarutsigu ingerlaarfissaq suli annertungaatsiarpoq. Inatsisinik atuutsitsinerup iluani pitsanngorsaatissanut ukiuni sisamani atugassatut folketingimiit 40 mio. kr.-it aningaasaliissutigineqarsimapput. Aningaasat taakku naleqquttumik pitsanngoriartitsinissamut naammakkumaarnersut piffissap takutikkumaarpaa. Uanga isumaga naapertorlugu ingerlassassanut annikitsukkutaaraluni aningaasalisarneq qimallugu Kalaallit Nunaanni inatsisinik atuutsitsinerup ataavartumik piffissamilu sivisuumi pitsanngorsaavigineqarnissaanut naalakkersuisut aningaasanut inatsimmi takuneqarsinnaasutut pingaarnersiuinerminni sallinngortitsinissaat kissaatiginarpoq.

 

Print Friendly, PDF & Email