Navigate / search

Kalaallit Illuisa isumaginninnermut suliaannut tapiisarnerit pillugit socialministeri akivoq

Kalaallit Illuisa isumaginninnermut suliaannut tapiisarnerit pillugit socialministeri akivoq
Kalaallit Illuisa isumaginninnermut suliaannut tapiisarnerit pillugit socialministeri akivoq

Isumaginninnermut ministeri Sara Olsvigimut (IA) akissuteqarpoq

 

Kiisami Isumaginninnermut ministerip Karen Hækkerup (S) sulissutiginialerunarpaa kalaallit illuutaasa isumaginninnikkkut suliniutaannut aningaasatigut tapiissutaasartut pituttuisimik inissisimalernissaat. Taamatut ministeri IA´p folketingimi ilaasortaata Sara Olsvigip apeqqutaanut sisamanut akissummini allappoq.

 

Qanittukkut Danmarkimi kalaallit illuutaat sisamat tamarmik Isumaginninnermut Akuliutsitsiniarnermullu Mi-nisteriaqarfimmut isumaginninnikkut suliniutinut kalaallit illuutaasa ataanni ingerlanneqartunut immikkut siunertalinnut tapiissutaasartunut tapiiffigineqarnissamut qinnuteqaatitik pillugit itigartitsissutinik allagarsipput. Itigartitsinermut peqqutaatinneqarpoq kalaallit illuutaat ingerlatsinermut tapiiffigineqartareernerat, tunngaviutinneqartorli tamanna folketingimi ilaasortamit Sara Olsvigimit illunilluunnit iluarisimaarneqanngilaq. Taamaattumik Sara Olsvig ataatsimiititaliaq aqqutigalugu apeqqutinik pingasunik §20-kullu apeqqummik ataatsimik Isumaginninnermut ministerimut nassiussaqarpoq, paaserusullugu ministeri qanoq iliuuseqassamaarnersoq isumaginninnikkut suliniutit aningaasatigut eqqanaarinniffiginissaat eqqarsaatigalugu.

 

”Apeqqutit atorlugit isumaginninnermut ministeri paasitilluarusuppara, kalalliit illuutaanni isumaginninnikkut suliniutit kalaallinut atugarliortunut Danmarkimi najugalinnut pingaarutilimmik sullissinerummata, aammalu suliniutit aningaasatigut pituttuisumik inissisimalersinneqarsimannginnerat pissutigalugu ukiut tamaasa kallaallit illuutaasa nalorninartumik inissisimasarnerat akuerisinnaanngikkipput”, Sara Olsvig oqarpoq.

 

Isumaginninnermut ministeri akissuteqaammini aamma allappoq, immikkut siunertalimmik tapiissutaasartunut partiit tunuliaqutaasunit isumaqatigiissutaasimasoq, 2013-imut tunngatillugu immikkut siunertalimmik tapissutaasartut isumaqatigiinniassutiginissaannut atatillugu eqqartorneqassasoq siunissamut isiginnittumik kalaallit atugarliortut kalaallillu meerartaasa suliniuteqarfiginissaat. Anguniarneqassaaq tamatumuunakkut ataatsimut isiginnittumik periusissaliortoqarnissaa. Periusissaq IA´mit qanganili ujartorneqartoq. Ilaatigut IA’p folketingimi ilaasortaasorisimasaata suliniuteqarneratigut Nunarput pillugu Ataatsimiititaliami/Grønlandsudvalgimi kalaallit atugarliortut qulequtsiullugit immikkut ataatsimiittoqarnikuuvoq.

 

”Kalaallit atugarliortut ataatsimoorussamik periaasissaliorfiginissaat pillugu Isumaginninninermut ministeriaqarfik erseqqissumik nalunaaruteqartarsimanngilaq. Taamaattumik nuannaarutigaara akissummi uani er-seqqissuliortoqarmat, neriuppungalu maanna suliassaq aallunneqarlualissasoq”, Sara Olsvig oqarpoq.

 

Taamaakkalurtoq kalaallit illuutaasa isumaginninnikkut suliniutaat suli nalorninartorsiorfiupput, tassami immikkut siunertalinnut tapiissutaasartunit tapiiffigineqarnissamut itigartinneqartinneqarnerup nassatarisaanik ilisimaneqanngimmat suliniutit 2013-imi tapiiffigineqassanersut. Isumaginninnermut ministeri Sara Olsvigip apeqqutaanut akissummini allappoq, illut suliniutimik kommuunini pituttuisumik inissisimalernissaat qinnuteqaatigeqqullugu, kisianni tamanna kommuunini assigiinngitsuni qanoq akuersaarneqartigissanersoq aamma nalorninarpoq. Isumaginninnermut ministeri akissummini aammattaaq allappoq, suliniutit siunissami pituttuisumik inissinneqarsinnaanerat pillugu illunik oqaloqateqartarnini nangittumik ingerlatissallugu.

 

”Apeqquteqaateqarnikkut aamma erseqqilluinnartumik oqaatigerusussimavara, kalaallit illuutaat maannakkorpiaq piviusumik imatut inissisimammata, nalullugu 2012 naappat qanoq pisoqassanersoq. Neriuutigeqaara isumaginninnermut ministerip suliaq manna nammassinissaata tungaanut malittarissagaa, isumaginninnikkut suliniutit aalajangiiffigineqavinnissamik tungaanut matugallartariaqarnerat pinaveersaarniarlugu”, Sara Olsvig oqarpoq.

 

Folketingimi ukioq suliffik aallartimmalli Sara Olsvigip (IA) suliniutigivaa kalaallit illuutaasa isumaginninnikkut suliniutaasa aalajangersimasumik aningaasaliiffigineqartalernissaat. Illuni taakkunani sisamani suliniutit pif-fissami sivisuumik immikkut suliniutinut tapissutaasartut nalorninartorsiorfiujuartut aqqutigalugit aningaasa-lersorneqarnikuupput. Isumaginninnikkut suliniutit immikkut suliniutinit tapiissutaasartunit aningaasalersukkat illut aalajangersimasumik ingerlatsinermut aningaasaqarnerannut missingersuutaasunit illut allarpassuartigut aaqqissugarisartagaannut atugassiat avataanniipput.

 

Print Friendly, PDF & Email