Navigate / search

Kalaallinut sakkutuujusimasunut Kalaallit Nunaanni ataqqinninnermik takutitsineq

Asseq: Inuit Ataqatigiit Folketingimi

Ukiut tamaasa septemberip tallimaani erfalasup ullua malunnartinneqartarpoq. Ullormi tassani illersuisoqarfiup suliniutai nunap iluani avammullu malunnartinneqartarput. Sakkutuujunikullu akornanni Kalaallit Nunaanninngaanneersut arlaqarput. Sakkutooqarfiup ministeriaqarfianiit naatsorsorneqarsimavoq sakkutuujunikut 92-it Kalaallit Nunaanneersuusut. Arlallit nunarsuup avataani sakkutuujusimapput nersugassaallutillu ataqqineqartariaqarlutik suliamik taamak ittumik uagut tamatta sinnerluta suliaqarsimammata.

Kalaallit Nunaat qujanartumik nunaavoq toqqissisimanartoq taamaattuarnissaalu pingaaruteqarsoraara. Ullutsinni suli qallunaat naalakkersuisuisa sakkutooqarnermut tunngasut akisussaaffigaat. Sakkutuujusimasullu nunatsinneersut qallunaat sakkutooqarfiata ataanni sakkutuujusimapput. Taamaammat Danmarkimi sakkutuujusimasut sullivianniit akisussaaffigineqartoq aamma eqqaamaneqartariaqarpoq Kalaallit Nunaanni Savalimmiunilu sakkutuujusimasunik najugaqartoqarnera eqqaamaneqartariaqarluni.

Ukioq manna augustimi sakkutuujusimasut sullissiviannut Kalaallit Nunaanniittumut pulaarpunga tassanilu suliassat ilaanniissimavoq kommuneqarfiit kingunipilutsitinermut tunngasunik (PTSD) ilinniartissallugit. Siunertarineqarporlu pulaarnerup kingorna pisoq nalunaarusiarineqassasoq. Kissaatigaaralu nalunaarusiaq siunnersuutissaqassasoq  nunatsinni sakkutuujusimasunut ikiorsiissutaasinnaasunik pitsanngorsaanissamut siunnersuisoqarsimanissaa kissaatiginarluni.

Ulluni makkunani inatsit nutartigaq sakkutuujusimasunut ikiorsiissutinut tunngasoq Danmarkimi tusarniutigineqarpoq. Assersuusiaralugu sakkutooq ajoqusissappat inatsit taanna aqqutigalugu aningaasatigut ikiorsiissutinut atorneqarsinnaavoq. Inuit avammut nassiunneqarpata qallunaat sakkutooqarfiata ataatigut naliginnaasuuvoq Danmarkimi najugaqarfeqartarneq. Taamaattumik tupinnanngilaq inatsit taanna Kalaallit Nunaannut Savalimmiunullu atuutinnginnera. Eqqaamasariaqarparpullu Kalaallit Nunnaannut nooreernerup kingorna kingunipilunnik (PTSD) eqqortittoqarsinnaammat. Taamaattumik pingaaruteqarsoraara sakkutuujusimasut pitsaasunik periarfissaqarnissaat qulakkerneqassasoq – aamma Kalaallit Nunaannut nooreernerup kingorna.

Politikkip tungaatigut Kalaallit Nunaanni sakkutuujusimasut eqqumaffiginerulerneri malunnaraluartoq suli aqqut takivoq. Ilami suliniuteqarnerup taassuma ilagivaa aamma Kalaallit Nunaanni sakkutuujusimasunik najugaqartoqarnera sammineqarnerulissasoq.

 

Erfalasup ullua atorluarisiuk!

Print Friendly, PDF & Email