Navigate / search

Isumaqatigiinniarnerit aallartipput: Aaja finansministerilu ataatsimiipput

Asseq: Inuit Ataqatigiit Folketingimi

Ippassaani, oktoberip 4-ani, Inuit Ataqatigiinnit folketingimi ilaasortap Aaja Chemnitz Larsenip finansministeri Kristian Jensen (V) naapeqatigaa naalakkersuisut aningaasartuutissanut inatsisinut 2018-mi pisussanut inissitsiteriniarlutik ataatsimiimmata. Ukiut aappassaanik Inuit Ataqatigiit folktingimi partiit tamaasa pissuteqarlutik peqataatippaat taakkullu akornanni Atlantikup avannarpasissuanit piginnaatitaasut aningaasartuutissanut inatsisissamut oqaloqatigiinnermi peqataatinneqarlutik.

”Nuannaarutigaara inatsisartunit Inuit Ataqatigiit Folketingimit oqariartuuterput Atlantikup avannarpasissuanit ilaasortanik isumaqatigiinniarnerni pingaarutilinni ilaasoqarnissaa tusaaneqarmat, tassani aamma aningaasartuutissanut isumaqatigiinniarnerit ilaapput. Taamaaliorneq ilitsoqqussanik pilersitseqataaneruvoq siunissamut kalaallinut iluaqutaasussaq. Politikki inuiaqatigiinnut ajunngitsunik inerniliinissamik siunertaqartarpoq, taamaammallu aningaasartuutissanut inatsisissamut sunneeqataanissaq Kalaallit Nunaannullu ajunngitsunik inerniliinissaq pingaaruteqarpoq”, Inuit Ataqatigiinnit Aaja Chemnitz Larseni aningaasartuutissanut inatsisissaq pillugu oqarpoq.

Ukiunut sisamanut tullernut aningaasartuutissanut inatsisissamit 40 mio. kr. eqqartuussisoqarnermut atugassanngorlugit siunnersuutigineqarput Inuit Ataqatigiinnit Folketingimi, Naalakkersuisuni Inatsisartunilu qasujaatsumik sammisami pitsanngorsaarusulluta sulisimanerput pisuulluni, taakkulu akornanni eqqartuussisoqarnermi pitsanngorsaanissamut siunnersuummik saqqummiinikuulluta.

Aaja Chemnitz Larsen itisiliivoq: ”40 mio. kr. taakku eqqartuussisoqarnermut pitsanngorsagassaqarnermut takutitsipput aallarniutaalluarsinnaallutillu, taamaakkaluartorli politiini radio-kkut atortussat nutaat ilassanik qaaqqusinissamut pinngitsoorneqarsinnaanngitsut  taama akeqarneri eqqarsaatigissagaanni suliaq allanit isigineqartariaqarpoq. Tamannami 40 mio. kr. akeqarnissaa naatsorsuutigineqarpoq atortussallu taarsigassanngornikuullutik. Inuit Ataqatigiit Folketingimit isumaqarpugut eqqartuussisoqarneq toqqissisimanartoq, naapertuilluartoq suliaalluarsimasorlu, soorlu aamma Danmarkimi Kalaallit Nunaat pillugu ilisimasaqarneruneq Danmarkimilu kalaallit sulisut amerlinissaat aningaasartuutissanut inatsisissami isumaqatigiinniarnernilu takkuttussani pingaartinneqarnissai pingaaruteqartut. 40 mio. kr. eqqartuussisoqarnissamut inatsisartunit pilersaarutigineqartut eqqaassanngikkaanni isumaqarpugut nunami sakkutooqarnermut atorfilinnut naammattunik tunniussisoqartariaqartoq inatsisimut nutaamut atuussinnaaniassammata. Tamanna pisariaqarluinnarpoq. Taamaammat ersarissumik aningaasartuutissanut inatsimmi taakku pingaartinneqarnissaat kissaatigalugu saqqummiuppara.”

Sakkutooqarnermut isumaqatigiinniarnerit takkuttussat pinerluttunillu isumaginnittoqarfik ataatsimiinnermi aamma sammineqarput. Isumaqatigiinniarnerit siunissami qaninnermi naammassineqassapput Inuit Ataqatigiilli isumaqatigiinniarnerni ilaanavianngillat. Inuit Ataqatigiit Folketingimi taamaammat aqqutit allat aqqutigalugit sunniuteqartussanik ujaarlerput, ass. politikkikkut siunnersuutinik saqqummiilluta isumaqatigiinniarnernilu oqaaseqartittakkanik toqqaannartumik oqaloqarteqartarluta.

Aningaasaqarnermut inatsit 2018-mi atuutilertussaq decemberimi naammassineqassaaq.

Inuit Ataqatigiinni folketingimi ilaasortap Aaja Chemnitz Larsenip oqaaseqartittakkanut ilanngussaa suliaq siulleq FFL18-meersoq link-imi uaniippoq: http://iafolketingimi.dk/wp-content/uploads/2017/09/Ordf%C3%B8rerindl%C3%A6g-ved-1.-behandling-af-FFL18_MF-Aaja-Chemnitz-Larsen.pdf

Print Friendly, PDF & Email