Navigate / search

Inuit Ataqatigiit Kalaallit Nunaanni peqquserluttarnernut akiuinermik nukittorsaaniarpoq

Asseq: Inuit Ataqatigiit Folketingimi

Arfininngorneq 9. december Nunani Tamalaani peqquserlunnaveersaartitsinissamut ulloritinneqarpoq. 2018-milu oktoberimi Ineriartortitsinermut ministeri Ulla Tørnæs nunarsuatsinni peqquserlunnginnissamut ataatsimeersuarfiit annersaanni Københavnimi qaaqqusisuussaaq. Sapaatip akunnerani aggersumi Inuit Ataqatigiit folketingimi ilaasortaatitaata Aaja Chemnitz Larsenip Ineriartortitsinermut ministeri naapissavaa, tassanilu kalaallit ataatsimeersuarnermi peqataatinneqarnissaat eqqartorneqassaaq.

Aaja Chemnitz Larsen itisiliivoq: ”Transparency International Greenland, Transparency Internationalimut ilaasortaavoq, taamaattumillu attuumassuteqartut allat, soorlu kommunit, Namminersorlutik Oqartussat allallu Kalaallit Nunaanni paasiuminarsaanissamut peqquserlunnaveersaartitsinissamillu siuarsaanissamik soqutiginnittut sullisissavakka. Nunanit allaniit ilinniagaqarnissarput naatsorsuutigivara, aammali paasiuminarsaanissamit, inuiaqatigiit peqataatinneqarnerinit peqquserlunnaveersaartitsinermiillu uagut misilittakkagut nunat allat iluaqutigisinnaassagaat.”

Transparency International nunarsuaq tamakkerlugu  nunani 100-t sinnilinni immikkoortortaqarpoq, tassanilu paasiuminarsaanissaq peqquserlunnaveersaartitsinissarlu siunertaapput. Transparency Greenland 2011-mi pilersinneqarpoq kalaallillu inuiaqatigiinni peqquserlunnaveersaartitsinissamik suliniuteqartuulluni.

”Inuiaqatigiinni peqquserluttarnerit ineriartortitsinissamut akornutaasarput, Kalaallillu Nunaanni peqquserlussinnaanerit eqqumaffigissavagut. Peqquserluttarnerit brancheni assigiinngitsuni pisarput, soorlu sanaartornerup, aatsitassarsiornerup aalisarnerullu iluini. Kalaallit Nunaata uppernassusianut, aningaasaliinerit siuarsaaviginissaannut nunallu allat niueqatiginissaanni peqquserlunnginnissat paasiuminartuunissallu pingaaruteqarput.” Aaja Chemnitz Larsen nassuiaavoq.

Kalaallit Nunaat Transparencyp peqquserlunnaveersaartitsinermi iliuusaanut suli tamakkiisumik peqataanngilaq, soorlu Transparency Internationals Corruption Perceptions-imut, nunat qanoq peqquserluttuutiginerinik naliliisarfimmut. Taamaattorli Transparency Greenlandimi 2016-imi misissuisitsivoq, misissuisitsineq Global Corruption Barometerimik taaneqartoq, unammillikkanillu arlalinnik taakkartuiffiusoq.

Print Friendly, PDF & Email