Navigate / search

Inuit Ataqatigiit illersornissamut isumaqatigiinniarnermi nutaami peqataatinneqarput

Asseq: Inuit Ataqatigiit Folketingimi

Folketingimi ilaasortap Aaja Chemnitz Larsenip (IA) ullumi forsvarsministeri Claus Hjort Frederiksen (V) illersornissamut isumaqatigiinniarneq takkuttussaq pillugu naapeqatigaa. Marluullutik augustimi illersornerup siunissami nunani issittuni suliassaat eqqartorpaat. Kingorna Inuit Ataqatigiit illersornissamut politikkimut siunnersuutitik saqqummiunnikuuaat inatsisartullu isumaqatigiinniarnermut siunnersuutertik saqqummiunnikuullugu. Ataatsimiinnermi akunnermik ataatsimik affarmillu sivisussusilimmi oqaluuserisat annikigisassaanngillat.

Illersornissamut isumaqatigiinniarnermut nutaamut Aaja Chemnitz Larsen ima oqaaseqarpoq: ”Kalaallit Nunaannut isumaqatigiinniarnerit pingaarutillit pineqarput. Isumaqatigiinniarnerit Folketingimi partiinut allanut ingerlateqqiinnarneqassanngillat, peqataasariaqarpugut. Taamaammat isumaqarpunga Kalaallit Nunaannut Inuit Ataqatigiit ukiut ingerlaneranni suliaannit maanna nammineq nunatsinnut sunneeqataanerulernerput qulakkeersimagipput.  Tusaaneqarnissarput kimigiiserluta sulissutigisimavarput maannalu tamanna takuneqarsinnaalerpoq.

Ullormi ataatsimiinnermi folketingimi ilaasortap illersornissamut isumaqatigiissummi nutaami ilungersuussani Inuit Ataqatigiinnit takorusutani erseqqissarpai. Pingaartumik illoqarfinni sakkutooqarnissaq ministerimut oqariartuutigaa. Sakkutuut Ulluat Kalaallit Nunaanni ingerlanneqartarnissaa, kajumissutsimik peqatigiiffimmik pilersitsisoqarnissaa aammalu innuttaasunut sakkutuutut Kalaallit Nunaanni ilinniartoqarsinnaanissaa inuusuttunut kajumissutsiminnik aaliangersimasunik upalungaarsimanissamut piginnaaneqalersitsisinnaaneq Inuit Ataqatigiinnillu suliniutitut Kalaallit Nunaanni illoqarfinni sakkutooqarnissamut iluaqutaanissaanik isummersorpoq.

Aaja Chemnitz Larsenip aamma Søren Pape Poulseni (K) ullumi naapeqatigaa. Tassani isumaqatigiilernissamut isumaqatigiinniarneq pinerluttunik isumaginnittoqarfimmut tunngasut sammineqarput.

Pisarnertut tusaaneqarneq ajoraluarpugut, nuannaarutigaarali siumut ataatsimiinnernut immikkut ittunut sammisani ministerinit aggeqquneqartaleratta ass. illersornissamut- aamma eqqartuussisoqarnermut ministerinit. Ataatsimiinnerit nuannerlutillu kinguneqartussatut ingerlapput neriunnarlunilu Kalaallit Nunaannut sunniuteqarluarumaartut. Maanna sapinngisatsinnik Kalaallit Nunaannut iluaqutaasussat sulissutigereerpagut.” Aaja Chemnitz Larsen naggasiivoq.

Print Friendly, PDF & Email