Navigate / search

Inuit Ataqatigiit Folketingimi politikkikkut siunnersuisussamik qitornartaarsimasumut sulinngiffeqartumut sinniisussamik ujaarlerput

Asseq: Inuit Ataqatigiit Folketingimi

Inuit Ataqatigiit Folketingimi qitornartaarsimasumut sulinngiffeqartumut sinniisussamik piffissap killillip iluani politikkikkut siunnersuisussamik pimoorussisumik ujaarlerput. Inuit Ataqatigiit Folketingimi partiimut allaffeqarfimmi eqeersimaartunik sulisoqarpoq folketingimi ilaasortamik ataatsimik sulisunillu tallimanik sulisoqarluni. Ulluinnarni pissanganartunik amerlasuunillu suliassanik naammassisaqartarpugut. Politikkikkut suliatsinni Kalaallit Nunaat, Danmarki nunallu issittut avannarliit nakkuttarpagut – immikkut Inuit Ataqatigiit politikkikkut suliassaannik nakkussisarluta. Sulilerfissaq majip aallaqqaataaniissaaq imaluunniit isumaqatigiissutigineqartoq malillugu aallartinneqassalluni.

Suliassat ilaatigut ukuussapput:

  • Folketingimi ilaasortaatitamut ulluinnarnilu allattoqarfimmi politikkikkut suliassatigut siunnersuinissaq, tapersersuinissaq kiffartuussinissarlu.
  • IA Folketingimi suliniutaanut peqataasumik sulissutiginninnissaq.
  • Suliniutit iluini misissueqqissaarnernik, tunualiaqutitut allaaserinninnernik, politikkikkut iliuuseqarnissanut tunngatillugu il.il. suliaqartarnissaq.
  • Kalaallit Nunaanni Danmarkimilu politikkikkut pisunik attuumassuteqartutigut nakkutiginninnissaq.
  • Attaveqaqatigiinnerup tusagassiutinillu attaveqarnerup iluani suliassanik isumaginninnissaq, ilaatigut tusagassiutitigut nalunaarusiornissat, naqitaliornissat il.il.
  • Ataatsimeersuarnernik, angalanissanik, seminarinik, ataatsimiinnernik il.il. ataqatigiissaarinissaq pilersaarusiortarnissarlu.

Pisinnaaffeqarfissat

IA-p folketingimi allattoqarfiani politikkikkut siunnersortissaq kalaallit-danskillu politikkiannut inuiaqatigiinnullu tunngasutigut soqutiginnittuullunilu ilisimasaqartuussaaq, Inuit Ataqatigiit naleqartitaannut pimoorussisuullunilu ilisimasaqartuussalluni. Namminersorlutit sulisinnaassuseqassaatit allattoqarfimmilu sulisunik folketingimilu ilaasortamik qanimut suleqatiginnissinnaassallutit. Aaqqissugaasumik sulisinnaassuseqassaatit, suliavit pitsaalluinnartuunissaannik pingaartitsisuussallutit, ulluinnarni ulapaarfiusumi sulisinnaassuseqarlutit suliassanillu arlalinnik ataatsikkoortitsinissamut pikkoriffeqarlutit. Allattariarsornermik oqaluttariarsornermilu attaveqarsinnaanermut pikkoriffeqassaatit misilittagaqartuullutillu, kiisalu angalasinnaaninnut piareersimasuussallutik.

Inuiaqatigiilerinermut, politikkimut aammalu/imaluunniit attaveqaqatigiinnermut ilisimasaqartuussaatit, inuiaqatigiilerinermut ilisimatusarnerup iluani ilinniagaqartuusinnaallutit, soorlu cand.scient.pol.-itut assigisaanilluunniit. Akissussaaffimmik tigusilluarsinnaasuussaatit namminerlu iliuuseqarsinnaassuseqarlutit, pisussanut sioqqutsisumik iliuuseqarsinnaassuseqarlutit, suleqatiginnilluarsinnaassuseqarlutit ilakkuminartuullutillu. Inuiaqatigiilerinermi, politikkimi aamma/imaluunniit attaveqaqatigiinnerup iluani misilittaqarneq iluaqutaalluassaaq. Kalaallisut, danskisut tuluttullu oqaaseqartuunissat kissaatigisinnaavarput.

Neqeroorutigaarput

Suliffik pissanganartoq neqeroorutigaarput, isumassarsiat pitsaasut tusarnaarneqartarfiat politikkikkullu sulinerup iluani suliassanut kiffaanngissuseqartumik sunniuteqarsinnaanermut periarfissiisut. Politikkikkut siunnersortitut atorfimmi kalaallini danskinilu politikkikkut aalajangiiniartarnerni qanimut suleqataanissaq periarfissaavoq, ilaatigut nunanut tamalaanut sammisutigut. Folketingimi allattoqarfiuvugut minnerusoq tallimanik sulisulik, tassalu folketingimi ilaasortaasup saniatigut aalajangersimasumik atorfillit marluk, studentermedhjælperi praktikkertorlu akademikeriusoq.

Allattoqarfimmi ikittunnguugatta ulluinnarni suliassat assigiinngissitaaqisut suleqatigiiffigisarpagut, taamaattumillu suliassatigut praktiskitigut peqataasinnaanissat naatsorsuutigissavat kiisalu pisuni immikkut suliassaqarfiulersuni tamatigoorsinnaassuseqarlutit, soorlu aamma unnukkut weekendinilu sulisoqarsinnaasartoq.

Qitornartaarsimasumut sulinngiffeqartumut sinniisuuneq qaammatinik aqqanilinnik sivisussuseqarnissaa naatsorsuutigineqassaaq. Suliffissaq Christiansborg-imiippoq Københavnimi inissisimasumi. Pisinnaasat apeqqutaatillugit akissarsiaqartinneqassaatit.

Qinnuteqaat

Qinnuteqaatit CV-talerlugu ajornanngippallu nersorneqarnerit allaffeqarfiup siulittaasuanut Anne-Katrine Brandt Olsenimut nassiunneqassapput mail-imut uunga: naanko@ft.dk. Atorfik pillugu apeqqutissaqaruit Anne-Katrine telefonikkut uunga sianerfigisinnaavat +45 61625223.

Qinnuteqarfissaq kingulleq martsip 19-at 2018.

Print Friendly, PDF & Email