Navigate / search

Inuit Ataqatigiit Folketingimi politikkikkut pimoorussilluartumik siunnersortissarsiorput

 

Asseq: Inuit Ataqatigiit Folketingimi

KALAALLIT NUNAAT FOLKETINGIMI SULLIKKUSUPPIUK?
Inuit Ataqatigiit politikkikkut tunniusimasumik siunnersortissarsiorput Folketingimi allaffeqarfimmi angivallaanngitsumi pisoqarfiulluartumili. Suleqatigiinni pissanganartunik assigiinngitsunillu suliaqartuni akuussaatit, ulluinnarnilu nutaaliornissamut periarfissaqarputit. Politikkip tungaatigut suliagut Kalaallit Nunaannut Issittumullu tunngasut arlaqarput politikkikkullu siunnersortitut Christiansborgip iluani pissaaneq qanimut misigissavat. Suliappit ilarissavaat folketingimi ilaasortamut siunnersuineq, paasisassarsiorneq, misissueqqissaarneq naliliinerlu, kiisalu pisussanik angalanissanillu piareersaaneq.

PISINNAASAT PIUMASAQAATIGINEQARTUT

Politikkikkut siunnersorti IA folketingimi sulisussaq Kalaallit Nunaanni politikkeqarneq inuiaqatigiinnilu pissutsit ilisimasaqarfigilluassavai aammalu politikkikkut immikkut tunniusimasuussaaq. Namminersorlutit sulisinnaasariaqarputit allaffeqarfimmilu suleqatitit allat suleqatigilluarsinnaasariaqarlugit, soorlu aamma folketingimi ilaasortaq avataaniillu suleqatit suleqatigisinnaasariaqassallugit. Tulleriiaarillutit sulisinnaasariaqarputit, suliappit iluamik suliarinissaat pingaartittuullugit pisullu assigiinngitsut ataatsimut isigisinnaallugit. Kalaallit Nunaata politikkia inuiaqatigiillu inissisimaneri kiisalu   misilittagaqarfigigukkit  iluaqutaassaaq  attaveqaqatigiinnermi piginnaasaqaruit aamma iluaqutaassalluni. Akisussaassuseqartumik, eqeersimaartumik suleqateqarusuppaluttumillu pissuseqarnissat naatsorsuutigaarput qiimasuunissallu naatsorsuutigalugu, soorlu aamma ilaatigut angalasarsinnaanissat naatsorsuutigissallugu.

NEQEROORUTIGISINNAASAGUT
Suliffeqarfimmik isummanik tusarnaarfiulluartumik neqeroorfigaatsigit sulisutullu kiffaanngissuseqarlutit suliassat suliarisinnaavatit. Suliffik allaffeqarfiuvoq angivallaanngitsoq arfinilinnik sulisoqarluni. Ulluinnarni suliassat assigiinngitsut inernilernissai sulissutigalugit suleqatigiilluartarpugut, tamannalu peqqutaalluni pisariaqartitsiffitsinni nikerartumik sulisinnaanissat piareersimaffigissagit naatsorsuutigaarput. Suliffeqarfik toqqissisimanartuunissaa, pissanganartuunissaa ineriartortuunissaalu ukkataraarput, ataqatigiinneq, suleqatinut isumaginninneq aamma atugaqarluartuuneq pingaartitaralugit. Suliffik Christiansborg-imi inissisimavoq. Akissarsiat pisinnaasat malillugit aaliangerneqassapput. Atorfeqarnermi inissamik neqeroorfigisinnaanngilatsigit.

QINNUTEQAAT
Qinnuteqaatit, CV-it, misilitsinnerni uppernarsaatit unnersuunneqarnermilu allatat Aaja Chemnitz Larsenimut nassiunneqassapput mailimut uunga: aaja.larsen@ft.dk.
Atorfik pillugu apeqqutissaqaruit Aaja Chemnitz Larseni telefonikkut attaveqarfiginissaanut tikilluaqqusaavutit uunga +45 61624667. 

Print Friendly, PDF & Email