Navigate / search

Inuit Ataqatigiit Folketingimi ilinniartumik ikiuutaasussamik Christiansborgimi suleqatissarsiorpoq

Ilinniaatigalutit saniatigut pissanganartumik suliffeqarusuppit? Politikkimik soqutigisaqarpit? Suliassat tamatigoortut paarisinnaavigit? Partiimut mikisumut folketingimiittumi sulinissat soqutiginartippiuk?  Ataatsimut isiginninniallaqqissuuguit suliassanillu ataatsikkut arlariiaanik aallussisinnaallutit, taava immaqa illit Inuit Ataqatigiit Folketingimi sulilersinnaavutit.

Inuit Ataqatigiit Folketingimi Christiansborgimi allaffeqarfeeqqatsinnut ulapaarfiusumut ilinniagaqartumik ikiuutaasutut sulisussamik ujarlerpoq. Aalajangersimasumik atorfilinnik marlunnik suleqateqarpugut ilinniagaqartorlu ikiuutasoq alla ataaseq sulisoralutigu, ilinniarnerminullu atatillugu suliffimmik misileraasoq aammattaaq ataaseq sulisoralutigu. Suliassat assigiinngiiaarput. Sulilersussap piginnaasaanut naleqqussarneqarumaarput.

Suliassat makku ilagivaat, allanngorarsinnaappulli:

  • Ullormut suliassat assigiinngisitaarsinnaasut, soorlu tusagassiutit sammisaannik nakkutilliineq, imaqarniliornerit, avammut tusarliisarneq il.il.
  • Akiligassanik isumaginninneq suliaqarnerlu, naatsorsuuserineq il.il.
  • Paasissutissanik tunngavissanillu ujarlerneq aammalu politikkikkut sammisat pillugit piareersaasiornerit
  • Nittartagalerisarneq, tassani ilaallutik WordPress aammalu qarasaasiakkut inuit attaveqaqatigiinnerat, soorlu facebook il.il. nakkutigineri
  • Sulinermut atatillugu angalanissat aammalu innuttanik ataatsimiitsitsinissanik piareersaaneq
  • Katerisimaartitsinernik piareersaaqataaneq ingerlatseqataanerlu, soorlu ataatsimeersuarnerit aaqqissuunneqarneri, Folkemødet, Unnuk kultorisiorfik il.il.

Sapaatip-akunneranut suliffissat akunnerit 12-15 tiimiupput, suliffillu DJØF-ip ilinniagaqartunut ikiuutaasunut akissarsiaritittagai malillugit akissarsiaqarfiussaaq. Atorfinitsitsinissamut oqaloqatiginninnerit sap. ak. 18-mi ingerlanneqarumaarput. Sulinermut aallartiffissaq maajip 29-iani 2017 piumaarpoq, aallartinnermi suliassanut ilisaritinnissaq pillugu akunnerit ikinnerusut suliffiujumaarput.

Atorfik soqutigigukku qinnuteqaatit sulerisimanermillu allattuiffik CV uunga nassiunneqassaaq Anne-Katrine.Olsen@ft.dk, nalunaaqutserlugu ”Ilinniartutut ikiuutaasutut atorfik”. Qinnuteqarfissaq kingulleq ataasinngorneq maajip aallaqqaataani 2017 nal. 12.00

Apeqqutissaqaruit allaffeqarfimmi pisortaq Anne-Katrine B. Olsen saaffigisinnaavat tlf. +45 3337 5500. Paasissutissat allat uani atuarsinnaavatit www.iafolketingimi.dk

Print Friendly