Navigate / search

Inuit Ataqatigiinnit folketingimut qineqqusaartut: Nunarsuarmik qorsuunerusumik allannguerusunnermi maannakkut iliuuseqartoqartariaqarpoq

Silap pissusaata allanngoriartornera kisimi takoqquvoq. Nunarsuarmi silap allanngoriartornerani ajornartorsiutit aaqqinngikkutsigit ullumikkut nalunngisatsitut nunarsuarput isikkoqarunnaartussaavoq. Inuit Ataqatigiinnit folketingimut qineqqusaartut taama ersaritsigisumik oqariartuuteqarput. Silap allanngoriartornera maannakkut iliuuseqartoqarnissaanik pisariaqartitsivoq kingullermimmi takuarput apriilimi ukiut hunnorujukkuutaartuni maanna pisumi qaammatini kiannerpaat aappaattut inissisimasoq.

Inuusuttut silap allanngoriartornera eqeersimaarfigilernikooqaat. Taakkuupput nangilluta akisussaaffimmik tigusisussat taamaammallu isumaqarpugut taakku siuttuullutik sorsoqataassasut uagullu qinikkat kajumissaartussaagaatigut isumaqarluta. Naalagaaffeqatigiinni Kalaallit Nunaat mingutsitsinerpaat ilaanniippoq taamaattorli inuit 56.000-iusugut tamatta naammattumik iliuuseqarsinnaanngilagut. Nunarsuarmi tamatta nunani issittuni, nunani avannarlerni aamma nunat assigiinngitsut akornanni suleqatigiilluta CO2-mik aniatitsineq annikillisittariaqarparput. Ersarissumik silap allanngoriartornerata kinguneri atorpagut.

Inuit Ataqatigiit siunnersuutit pingasut piviusut tunngavilersuutigaat:

  1. Inuiaqatigiinni inuusuttunik panelimik pilersitsisoqassaaq taakkulu Naalakkersuisunut qanoq emission-inik annikillisitsinissamut aamma silap allanngoriartornerani inerniliinissamut siunnersuuteqarlutik kajumissaarisassapput.
  1. Kalaallit Nunaat 2050-imi emission-inik aniatitsisarunnaarsimassaaq 2050-illu tungaanut aniatitsinerput qanoq annikillisissanerlugu iliusissanik qinersinissaq pisariaqartinneqassalluni. Silap allanngoriartorneranik soqutiginninneq politikkimi ilaassaaq.
  1. Innuttaasunut tamanut silap allanngoriartoneranut tunngasumik ajunngitsumik iliuseqarnissaq oqitsuusariaqarpoq tamannalu politikkikkut qulakkiissavarput, ass. nerisassat mingutsitsisuunngitsut tamanut ammasuni pissarsiarineqarsinnaasariaqarput, soorlu aamma eqqakkat qanoq suliarineqartassanersut eqqartorneqassallutik aamma nerisassanik igitsiinnartarnerit annikillisinneqassallutik.

Uagut inuiaqatigiit piareersimaneri upperaarput. Qinikkatut atuisut innuttaasullu toqqagaat oqilisaattussaavagut taamaalillutalu nunarsuaq kinguaariinnut tulleriittunut ajunnginnerusoq taperseeqataaffigisinnaallugu.

Ullumikkut iliuuseqanngikkutta mingutsitsinerullu tungaatigut politikkikkut iliuuseqarnerunata silap pissusaannik allanngortoqarnerata kingunerisaanik qimaasut, ajunaarnersuit silallu allanngornera ulluinnatsinni allannguititsisuujumaarput. Pingaartumik tamanna Kalaallit Nunaanni inuuffitsinni pinngortitamilu avatangiisitsinni malugineqarumaarpoq.

Attavissaq:

Aaja Chemnitz Larsen, mobil. nr. +45 61 62 46 67/24 58 90

Sofia Geisler, mobil nr. 58 81 55

Anders Jensen, mobil nr. 25 88 22

Aqqalukkuluk Fontain, mobil nr. 53 88 65

Print Friendly, PDF & Email