Navigate / search

Inuit Ataqatigiinniit eqqartuussisoqarnermut tunngasutigut Folketingimi oqallitsitsisoqalerpoq

Asseq: IA Folketingimi

Inuit Ataqatigiit folketingimi ilaasortaatitaata Aaja Chemnitz Larsenip iliuuseqarneratigut eqqartuussisoqarnermut tunngasut tamanut ammasumik tusarniutigineqassasut Folketingip Retsudvalgiata 22. marts 2017-imi pisussatut maanna aalajangiuppaa. Tusarniaasitsineq Nunarput pillugu Ataatsimiititaliaq suleqatigalugu Folketingimi ingerlanneqassaaq, taamatullu Inuit Pisinnaatitaaffiinut Kalaallit Nunaata Siunnersuisoqatigiivisa aammalu Inuit Pisinnaatitaaffiinut Institutip, kiisalu Advokatit Siunnersuisoqatigiiffiata qanittukkut inassuteqaataat malinneqarpoq. Eqqartuussisoqarnermut tunngasut danskit akisussaaffigivaat, Inuit Ataqatigiinniillu ukiorpaalunngortuni susassaqarfiup tamassuma pitsanngorsaavigineqarnissaanut, taamatullu aningaasaliinerit pisariaqartut immikkoortinneqarnissaannut sulissutiginnittoqarsimavoq. Tusarniaasitsinermittaaq pinerlunnissamut pinaveersaartitsinissaq anguniarlugu Kalaallit Nunaallu suleqatigiinnerup nukittorsarneqarnissaa aallunneqassaaq.

Danskit naalakkersuisuisa naalakkersuinerminni tunngavimminni allassimavaat Savalimmiuni Kalaallillu Nunaanni danskit akisussaaffigisaatigut Danmarkimi pitsaassutsikkut atuuttoq sulissutigineqassasoq. Tamannarpiarlu tusarniaasitsinerup matuma qulakkeerniagassarigaa Aaja Chemnitz Larsenip (IA) tikkuarpaa.

Aaja Chemnitz Larsen ima itisiliivoq: ”Inuit Pisinnaatitaaffiinut Institutip/ Inuit Pisinnaatitaaffiinut Kalaallit Nunaata Siunnersuisoqatigiivinit aammalu Advokatit Siunnersuisoqatigiiffiannit, pingaartumillu Flemming Balvigip nalunaarusiaani kingullermi ’Kriminalitet og retsbevidsthed – i Grønland’, (Kalaallit Nunaanni Pinnerluttuliortarneq naapertuilluarnermillu misigissuseq), naqissuserneqarpoq Kalaallit Nunaanni eqqartuussisoqarnermut tunngasutigut aaqqitassatigut misissuinissaq pisariaqartinneqartoq. Inatsisit susassaqarfimmilu tassani malittarisassat inuiaqatigiit nutaaliaasut aallaavigissavaat, taamaattumillu ilaatigut eqqartuussiveqarfimmi pisinnaasatigut nukittorsaanissaq pisariaqartinneqarpoq. Taamaasiornikkut illersuisut unnerluussisullu suliassaminnut piukkunnarsarneqassapput, soorlu aamma inuiaqatigiinni inatsisitigut isumannaatsuunissatigut iluaqusinissami kredsdommerit pisinnaasaat nukittorsarneqassasut.”

Eqqartuussisoqarneq, politiit pinerlussimasunillu isumaginnittoqarfik tamarmik immikkut pingaaruteqartutigut suliaqartarput, eqqartuussisoqarfimmilu inuit suliassamut tassunga pikkorissusillit amerlasuut pigineqarput. Eqqartuussisoqarfimmi immikkoortortat assigiinngitsut assigiinngissitaartunik unammilligassaqarput, naapertuuttumillu pitsanngorsaanissami iluarsiissutissat ataqatigiissaarneqartariaqarput. Aamma Namminersorlutik Oqartussallu peqateqarnissaq pingaaruteqarpoq, tassami assersuutigalugu inunnik isumaginnittoqarfik kalaallit akisussaaffigivaat, suliffeqarfiillu oqartussallu akornanni ataqatigiissaarinissaq pisariaqassaaq.

Aaja Chemnitz Larsen oqarpoq: ”Politikerit annertuunik anguniagaqartuunissaat ukiorpassuillu siumut isigalugit eqqarsarnissaat pisariaqarpoq. Eqqartuussisoqarnermik pitsanngorsaanissaq piffissaq sivisooq atorlugu suliassaavoq, taamaattumillu siunissami inuiaat inatsisitigut illersugaanerisigut nukittorsaassagutta ullumikkut politikkikkut iliuuseqartariaqarpugut. Tusarniaasitsinermi suliassat qanoq aaqqiivigineqarnissaannut politikkikkut oqariartuummik saqqummiussissaanga.”

Pinerluttulerinermi inatsit aamma eqqartuussisaaseq pillugu inatsit kingullermik 2010-mi nutarterneqarput, Folketingimilu tusarniaasitsinikkut inatsiseqarnikkut tunngasutigut, eqqartuussisoqarneq ilanngullugu, sinaakkutissanut tunngasut eqqartorneqarnissaat ammaanneqassapput. Kalaallit eqqartuussisoqarfianni inuinnaat qanimut sullinneqarnissaat kiisalu akuulersitseqqinnissamik pinerluttunillu aallussinissat qitiupput ingerlateqqinneqartariaqarlutillu.

Siusinnerusukkullu IA-miit Nuna Tamakkerlugu Illersuisuunermik toqqaanissaq sulissutigisimavarput, tamannalu piviusunngoraluttuarpoq. Tamanna akuerisaallutik illersuisut nukittorsarneqarnissaannik kinguneqassasoq IA-miit naatsorsuutigaarput, piffissalli takutikkumaarpaa Illersuisuuneqarfimmut nukiit atorneqartussat naammakkumaarnersut.

Tusarniaasitsinermi saqqummiussisussat taakkuussapput ulluinnarni susassaqarfimmik tamassuminnga suliallit, soorlu aamma Naalakkersuisut Inatsisartullu Inatsisinut ataatsimiititaliaat qaaqquneqarumaartut. Tusarniaasitsineq tamanut ammasuussaaq, allatsinnissarli pisariaqarpoq. Annertunerusumik paasissutissat Retsudvalgip quppersaagaaniipput, uani.

 

Attavissaq: Aaja.Larsen@ft.dk iml. +45 61624667.

Qulaani nalunaarutinut taaneqartunut Linkit

 Kalallit Nunaanni inuit Pisinnaatitaaffi – killiffik 2016 

Eqqartuussissuserisut Siunnersuisoqatigiit 2016 – Kalaallit Nunaanni Inatsisitigut isumannaassuseq 

Professor Flemming Balvig (qallunaatut)– Kriminalitet og retsbevidsthed – i Grønland

Print Friendly, PDF & Email