Navigate / search

Inuinnaat illersornissaqarfimmi ilinniagaqartinneqarnissaannut Inuit Ataqatigiinniit sorsuutiginninneq kinguneqarpoq

Asseq: Inuit Ataqatigiit Folketingimi

Ullumikkut illersornissatigut isumaqatigiissut 2017-miit 2023-mut atuuttussaq naalakkersuisuniit saqqummiunneqarpoq. Ukiap ingerlanerani Aaja Chemnitz Larsen (IA) qasseeriaqaluni Illersornissamut ministerimik Claus Hjort Frederiksenimik (V) isumaqatigiissut pillugu ataatsimeeqateqartarsimavoq. Folketingimi ilaasortamiit sumiiffinni kalaallit Illersornissaqarfimmi akuutinneqarnerunissaat sallertut kissaatigineqarsimavoq. Isumaqatigiissummi Kalaallit Nunaanni upalungaarsimanerup iluani nutaamik ilinniagaqarsinnaaneq anguniarneqarmat taamaasillluni kalaallit peqataatinneqarnernissaannut sorsuutiginninneq kinguneqarpoq.  

”Isumaqatigiissutitigut Kalaallit Nunaanni ilinniagaqarnissamut periarfissat nutaat qulakkeerneqarput. Tamanna nuannaarutigivara. Illersornissaqarfimmi suliassanut kalaallit akuutinneqarnerunissaannik ammaassineq kalaallinut inuiaqatigiinnut Illersornissaqarfimmullu pitsaasuuvoq.” isumaqatigiissut nutaaq pillugu Aaja Chemnitz Larsen oqarpoq.

2017-imi ukiakkut Inuit Ataqatigiinninngaanniit ”Issittumut isumannaatsumut anguniagassat qulit” illersornissatigut naalakkersuinikkut siunnersuutigivagut, tassanilu Kalaallit Nunaanni illersornissatigut iliuusissat nutaat pitsanngorsaatissallu arlalissuit siunnersuutigaagut. Inuit Ataqatigiinniit pingaartumik Kalaallit Nunaanni sumiiffinni aallaaveqarnerusumik illersornissatigut peqataatitsinissaq kissaatigineqarpoq, tassa Arktisk Kommandomi amerlanerit ilinniartinneqarlutillu atorfinitsinneqarnissaat eqqarsaatigalugu. Kissaatittaaq siunnersuutiniittut Aaja Chemnitz Larsenimit Illersornikkut ministerimut folketingillu illersornissatigut oqaaseqartittagaanut saqqummiunneqarsimapput.

Naalakkersuisunik isumaqatigiinniartitanillu suleqateqarsimaneq pillugu Aaja Chemnitz Larsen oqarpoq: ”Sakkortusimavoq, naalakkersuisulli isumaqatigiinniartitallu Inuit Ataqatigiit sumiiffinni inuit peqataatinneqarnerunissaannut kiisalu pilersaarutaagaluamiit avatangiisinik saliinissanut aningaasanik amerlanernik kissaateqarnerannik tapersersuisimanerat nuannaarutigivara.”

Illersornissatigut isumaqatigiissut tamakkiisoq uani atuaruk (Arktis qup.11): http://www.fmn.dk/temaer/forsvarsforlig/Documents/Forsvarsaftale-2018-2023.pdf

Print Friendly, PDF & Email