Navigate / search

International Polar Year 2012-mut Sara peqataavoq

International Polar Year 2012-mut Sara peqataavoq
International Polar Year 2012-mut Sara peqataavoq

Ilisimatuut, naalagaaffiit sinniisui, atorfilittat, politikerit nunallu inoqqaavi nunani issittuneersut ulluni makkunani International Polar Year-mut atatillugu isumasioqatigiinnersuarmi Montrealimi katersuussimapput. Folketingimut ilaasortaq Sara Olsvig (IA) issittumi inatsisartut ataatsimiititaliaannut SCPAR-mut ilaasortaanerminut atatillugu peqataavoq. SCPAR sapaammi immikkut sammisaqartitsissaaq.

 

Ukioq manna issittoq pillugu isumasioqatigiinnissat annersaat “IPY2012 – From Knowledge to Action” Montrealimi ulluni makkunani aallartippoq. Isumasioqatigiinnermi ilaatigut avatangiisinut, inooqatigiinnermut aningaasaqarnermullu tunngasut eqqartorneqassapput inuillu 2000-it sinnerlugit peqataassallutik. Ilisimatuut, NGO-t, nunat inoqqaavi, ilinniartut politikerit isummersortartullu peqataasut akornanniipput isumasioqatigiinnerullu siunertaraa ilisimatusarneq tunngavigalugu politikkikkut ingerlariaqqinnissat pillugit iliuusissanik tikkuartuinissaq.

 

Issittumik inatsisartut ataatsimiititaliaat peqataapput

Sara Olsvig (IA) issittumi inatsisartut ataatsimiititaliaat, SCPAR, peqatigalugit isumasioqatigiinnermut peqataavoq. Sapaammi ataatsimiititaliami ataatsimiittoqassaaq immikkullu sammisaqartitsinermi. ataatsimiititaliap issittumi ineriartortumi naalakkersuinikkut iliuusissat pillugit nalunaarusiartik saqqummiutissavaat. Issittumi pisut annerpaartaat Issittumi Siunnersuisoqatigiinni eqqartorneqartarput Issittumilu Siunnersuisoqatigiit amerlasuutigut suleriaatsimini aaqqissuussaanerminilu immikkuullarissuulluni.

 

“Issittoq pillugu suliaqarnermi ersarissigaluttuinnarpoq issittup avataanit soqutigineqaraluttuinnarnera Arktisk Rådimi suleriaatsinik ilaatigut allannguisariaqarnermik kinguneqartoq. Taamaammat SCPARimi tassunga atatillugu innersuussutissatsinnik imalimmik maanna nalunaarusiorpugut”, Sara Olsvig oqarpoq.

 

SCPAR-mi ataatsimiinnerni tulliuttuni marlunni nalunaarusiaq inaarsarneqassaaq. Ataatsimiinnissat tulliat Nuummi juunimi pissaaq Islandimilu Akureyrimi septembarimi ataatsimiisitaliaq isumasioqatigiisitsilerpat nalunaarusiap inaarneqarnissaa naatsorsuutaalluni.

 

IPY-mit isumassarsititaaneq

Montrealimi isumasioqatigiinnersuarmi IPY2012-mi ilisimatuussutsikkut tamat tikillugit eqqartuineq isumassarsiffissatsialaavoq. Taamaammat SCPAR-mut ilaasortat arlallit isumasioqatigiinnersuarmut ullut ilai peqataaniarlutik Canadami naapipput.

 

“Issittoq pillugu politikkikkut, inooqatigiinnikkut ilisimatusarnikkullu eqqartuisoqartillu peqataanissaq pingaartippara. Maani IPY-toqarnerani inuppassuit issittumi najugallit issittumillu sammissallit katersuussimassapput issittumilu inoqarnera, inuillu naalakkersiunikkut ineriartornermilu qitiutinneqarnissaat tassarliunnaavoq SCPAR-mi nalunaarusiornitsinni uanga nalunaarusiamut ilanngukkusutakka”, Sara Olsvig oqarpoq.

 

SCPAR, issittumi inatsisartut ataatsimiisitaliaat, arktisk parlamentarikerkomitemik aamma taaneqartartoq, 1994-mi Nunat Avannarliit Siunnersuisoqatigiiffiannit Nordisk Rådimit innersuussuteqarnermi pilersinneqarpoq. Suliassaraat nunat tamalaat akornanni inuiaat issittormiut pillugit suliaqarneq nukittorsassallugu.

 

Print Friendly, PDF & Email