Navigate / search

Inissiisarfinni nakkutilliisut akissaataat naapertuutinngitsut

Asseq: Inuit Ataqatigiit Folektingimi

Kalaallit Nunaanni pinerlussimasunut inissiisarfinni nakkutilliisut suli danskit naalagaaffiannit atorfeqartinneqartuupput, suliaqarlutillu pingaaruteqartumik. Akissaataalli atorfiup pingaaruteqartuuneranik takussutissartaqanngillat. Taamaattumik folketingimi ilaasortap Aaja Chemnitz Larsenip Inuit Ataqatigiinneersup danskit inatsisinut atuutsitsinermut ministeriat, Søren Pape Poulsen, Kalaallit Nunaanni inatsisinik atuutsitsinermut akisussaanerpaajusoq, ataatsimeeqatiserisimavaa. Maanna piffissami sivitsortumi Inuit Ataqatigiinniit inissiisarfinni nakkutilliisut unammilligassaat taakkartorneqarsimapput, tusaaneqanngitsumilli. Tamanna Aaja Chemnitz Larsenimit iliuuseqarfigineqarniarpoq. Inissiisarfinni nakkutilliisut akisussaaffiinut naapertuuttumik isumaqatigiinniat akornanni isumaqatigiittoqartariaqarpoq.

Aaja Chemnitz Larsen oqarpoq: ”Pinerlussimasunut inissiisarfinni nakkutilliisut Peqatigiiffiat oqaloqatigisimavara, akissaatitigullu atugaat tupaallassutigilluinnarpakka. Folketingimi ilaasortatut naalagaaffiup sulisuni taamatut naapertuutinngitsigisumik pisinnaammagit kanngusuutigaara. Nalunngikkaluarpara unammilligassartaqartoq, akissaatilli taamak naapertuutinngitsigineri tupinnaqaat. Inissiisarfinni nakkutilliisut pinerlussimasunik paarsisarput taamaassillutillu aamma tamatsinnut paarsisuullutik, taamaattorli suliffimminni pitsaasunik atugaqanngillat. Inuiaqatigiinni suliassamut taamak pingaaruteqartigisumut naalagaaffik taamatut atugassaqartitsisinnaanngilaq.”

Inissiisarfinni nakkutilliisut akissaatitigut atugaat naapertuutinngilluinnartut pissutigalugit nakkutilliisut asoortarput taarseraattuarlutillu, tamannalu suliap pitsaassusaanut ajorseriartitsisarpoq. Nuummi nakkutilliisunut atorfiit akuerisaareersut 29-iupput, maannakkulli sulisut 17-iinnaapput, taakkualu nakkutilliillutik sulinerat tamakkersorpoq.

Tassunga atatillugu Aaja ima oqarpoq: ”Akissaatit naapertuuttunngortinngikkutsigit ajornartorsiut aaqqiivigisinnaanngilarput. Allaat nakkutilliisut ukiorpassuarni sulisimasut suliaminnut tunngatillugu akuersorneqanngillat ulluinnarnilu inuuniutissamikkut amigartoorsinnaasarlutik. Naalagaaffiup ataani atorfillit qaammatikkaartumik akiligassanut akiliutissaqarumallutik kommunimut ikiorseqqusarnerat naapertuutinngilaq. Taamatut pisoqartarnera ingasalluinnarpoq. Ajortoq tamanna akissaatit naapertuuttunngortinnerisigut iluarsiivigisariaqarparput, tamannalu isumaqatigiinniat akornanni pisariaqarpoq. ”

Folketingimi ilaasortaq Fængselsforbundimik ataatsimeeqateqartussaavoq, tassanilu unammilligassap tamatuma peqatigiilluni qanoq iliuuseqarfigineqarsinnaanera eqqartorneqassaaq.

Print Friendly, PDF & Email