Navigate / search

Iliuusissiaq nutaaq: Danskit nunanut allanut politikkianni Issittoq pingaarnernut tallimanut ilannguppoq

Asseq: Inuit Ataqatigiit Folketingimi

Ullumikkut nunanut allanut ministerip Anders Samuelsenip (LA) aamma Ineriartortitsinermut ministerip Ulla Tørnæsip (V) VKLA-t Nunanut Allanut Sillimaniarnermullu politikkitigut naalakkersuisut Iliuusissiaat qangalili utaqqineqartoq saqqummiuppaat. Iliuusissiami pingaarnertut aallussassat tallimaasut Issittoq akornanniippoq.

”Issittup aallunneqarnerunissaa pissusissamisoorpoq, Folketingimilu Inuit Ataqatigiit iliuuseqartarsimanerisa allannguuteqartitsineratut takussutissaalluni, taamaasillunilu Kalaallit Nunaata nunanut allanut sillimaniarnermullu politikkimut sunniuteqarsinnaanissaa qulakkeerneqarluni. Tassa Kalaallit Nunaannut iluaqutissatut naammassisaqartoqarpoq.” Imalu itisiliivoq: ”Kalaallit Nunaanni aningaasatigut ineriartortitsinermik aallussineq, illersornissatigut nukittorsaaneq issittumilu ilisimatuutut misissuivimmik pilersitsinissaq tamarmik tassaapput kalaallinut inuiaqatigiinnut iluaqutaasussat folketingimilu sulinitsinni qaqissimasagut, nuannaarutigaaralu pisat taakkua pingasut maanna naalakkersuisuniit aallunneqalermata”, Aaja Chemnitz Larsen (IA) iliuusissiaq atuareerlugu oqarpoq.

Iliuusissat nukittorsarneqarput 

Iliuusissiami susassaqarfiit pingasut danskit-kalaallillu Issittumi suleqatigiinneranni annertunerusumik sammineqartariaqarsorisatut Inuit Ataqatigiit isumaqarfigisaat erseqqissarneqarput.

Iliuusissiami Kalaallit Nunaanni illersornissatigut iliuutsit nukittorsarneqarnissaat saqqummiunneqarpoq. Tamanna Arktisk Kommandop nukinnik annertunerusunik pisariaqartitsineranik, taamatullu illersornissaqarfimmi kalaallit ilinniartitaanikkut kujumissutsimillu aallaaveqartumik akuutinneqarnerunissaannut iliuuseqartoqarnissaanik Inuit Ataqatigiit ukiorpassuanngortuni oqaluttuarnerannut naapertuuppoq. 

Inuit Ataqatigiit Folketingimi qinigaaffimmi matumani Kalaallit Nunaanni siuarsaanissaq inuussutissarsiutitigullu ineriartortitsinissaq aallussimavaat, tassa Kalaallit Nunaannut aningaasaliinissat qulakkeerneqarnissaat aammalu kalaallit suliffeqarfiutaasa siuarsarneqarnissaat eqqarsaatigalugit. Taamaattumillu naalakkersuisut aningaasatigut diplomatiitigut annertusaanissamik Issitumilu siuarsaanissamik pingaartitsinerat tusarluarnarpoq, tamannalu folketingimi ilaasortamit Aaja Chemnitz Larsenimit nuannaarutigineqarpoq.

Naalakkersuisut Nunanut Allanut Sillimaniarnermullu politikkitigut iliuusissiaanni aallunneqartussat pingajuanni issittumi ilisimatusarnikkut nukittunerusumik ilisarnaateqarnissaq pineqarpoq. Tassani nunani tamalaani ilisimatusaatini sumiiffinni ilisimatusaatit kalaallillu ilisimatusartut akuutinneqartarnissaat Inuit Ataqatigiinniit oqaatigisarsimavarput. Tassani ilisimatusarnerup nutaanik ilisimasatigut suliffissatigullu Kalaallit Nunaannut iluaqutaanissaa anguniagaavoq, Kalaallit Nunaannilu ilisimatuutut misissuiviliornikkut tamanna pisinnaavoq.

Amigaataasut erseqqarissut 

Taamaattorli Kalaallit Nunaata, Danmarkip USA-llu suleqatigiinnissaasa iliuusissiami ataasiarluniluunniit eqqaaneqannginnerat Inuit Ataqatigiit Folketingimi ilaasortaatitaanit tupigusuutigineqarpoq. Kalaallit Nunaata nunanut allanut politikkitigut aallussaani suleqatigiinnissaq qitiulluinnartoq.

”Amerikkarmiut Kalaallit Nunaanniinnerannut atatillugu pisat naammassineqanngitsut arlaliupput, taakkualu iliuusissiami eqqaaneqanngillat. Taamaattoqarneralu Pituffimmut imaluunniit sakkutooqarfikuni avatangiisinik mingutsitanut naalakkersuisut pingaartitsinnginnerattut paasineqarsinnaavoq. Pisat taakkua aningaasaqarnermut Kalaallit Nunaatalu avatangiisaanut pingaaruteqarluinnartuummata tamanna uggornarluinnarpoq.” Aaja Chemnitz Larsen naggasiivoq.

Naalakkersuisut Nunanut Allanut Sillimaniarnermullu politikkimi Iliuusissiaat nutaaq uani atuaruk: http://um.dk/da/nyheder-fra-udenrigsministeriet/NewsDisplayPage/?newsID=9B6A3B00-10EE-4020-99C3-FA7A7C92B024

Print Friendly