Navigate / search

IAp illersornissamullu ministerip Issittoq pillugu nalunaarusiaq oqaloqatigiissutigaat

IAp illersornissamullu ministerip Issittoq pillugu nalunaarusiaq oqaloqatigiissutigaat
IAp illersornissamullu ministerip Issittoq pillugu nalunaarusiaq oqaloqatigiissutigaat

16.08.16

Ullumi Aaja Chemnitz Larsenip, Inuit Ataqatigiit illersornissamut ministeri Venstre-meersoq Peter Christensen ataatsimeeqatigaa, Kalaallit Nunaanni Issittumilu Illersornissamut Qullersaqarfimmit siunissami sullisseriaaseqarnissaq oqaloqatigiissutigissallugu. Ataatsimiinnermut tunngaviuvoq sivisuumik utaqqimaarneqarsimasup Illersornissamut Qullersaqarfiup Issittoq pillugu nalunaarusiaa, ukiunik arlalinnik kingusinaarluni junimi saqqummersoq.

Illersornissamut Qullersaqarfiup Kalaallit Nunaanni suliassaanut kalaallit akuutinneqarnerunissaat qangalili Inuit Ataqatigiit Folketingimit pingaartitatut suliniutigineqarnikuuvoq. Ilaatigut partii isumaqarpoq, nunatsinni najugaqarfinni innuttaasunik akuutitsinerunerunikkut Kalaallit Nunaanni Sakkutooqarfik piginnaanngorsaanermut, ilinniakkatigut suliffeqarnikkullu iluaqutaasinnaasoq. Ullumi ataatsimiinnermi nunatta folketingimut ilaasortaatitaata erseqqissarpaa, nuannaarutissaatikkini maanna suliniuteqalermat annertunerusumik akuutitsisoqarnissaanik IAp kissaateqarneranik eqquutsitsisinnaasunik.

Aaja Chemnitz Larsen (IA) oqarpoq: ”Sakkutooqarnikkut tunngaviusumik ilinniartitaanermi Kalaallit Nunaanni aallartinneqartussatut pilersaarutaasumi piginnaasatigut anguniagassaatitaasussani sammivigineqartariaqarput Kalaallit Nunaanni piginnaasatigut ujartorneqartut, assersuutigalugu Kalaallit Nunaanni Piumassutsutsimik Sakkutooqarneq, piffisarlu ungasinnerusoq eqqarsaatigalugu Kalaallit Nunaanni Sakkutooqarfimmi akissaateqarluni suliffeqalersinnaaneq tamannalu aqqutigalugu Kalaallit Nunaanni inuiaqatigiinnut tamakkiinerusumik iluaqutissiinissaq”.

Ataatsimiinnermi aamma eqqartorneqarput politikkikkut suleriaaseqartarneq aamma illersorneq pillugu isumaqatigiinniarnissamut tunngasut.

Illersornissamut ministerimik ataatsimeeqateqareerluni Aaja Chemnitz Larsen (IA) oqarpoq: ”Illersornissamut tunngassuteqartut Kalaallit Nunaat sinnerlu Folketingimi sulinermi pingaaruteqarluinnartuupput, nuannaarutigaaralu illersornissaq pillugu isumaqatigiinniarnissamut nunatsinneersunik peqataasoqarsinnaanera illersornissamut ministerimit tunuarterfigineqariinngimmat. Pingaaruteqarluinnarpoq nunatsinni pissutsit pillugit nunatta folketingimi ilaasortaatitaanit ilisimaarininnerup Naalagaaaffeqatigiit iluani illersornissap tungaatigut ataatsimut suliniuteqarnermi ilanngulluni isiginiarneqarnissaa”.

Attaveqarfissaq:Aaja.Larsen@ft.dkog mobil: +45 61 62 46 67

Issittoq pillugu nalunaarusiamik takunniffissaq: http://www.fmn.dk/nyheder/Documents/arktis-analyse/forsvarsministeriets-fremtidige-opgaveloesning-i-arktis.pdf

Print Friendly, PDF & Email