Navigate / search

IA-meersut kiinnamik ilisarnartumik tikilluaqqusipput

Inuit Ataqatigiit allaffeqarfianit Folketingimit junip aallaqqaataani Sara Biilmann Egede tikilluaqquarput maanna politikkikkut siunnersortitut sinniisutut atorfeqarallalersoq allaffeqarfimmi pisortap Anne-Katrine Brandt Olsenip ernereernermini sulinngiffeqarnerani sulisussaalluni.

Sara Roskilde Universitetscenter-imit Kommunikation-imi aamma Arbejdslivsstudier-ini universititimi inerluni soraarummeeqqammerpoq immikkut Kalaallit Nunaanni suliffeqarfinni atugarissaarnissaq sammillugu soraarummiissutigalugu. Sara ilinniarnermini Kalaallit Nunaanni pissutsit immikkut ukkatarivai taamaalillunilu Kalaallit Nunaanni politikkikkut inuiaqatigiinnilu pisunut ilisimasaqarlualernikuulluni. Christiansborg-imi sulineq Saramut nutaajunngilaq, Sarami siornatigut Inuit Ataqatigiit Folketingimi ilinniartutut ikiortaalluni sulinikuummat. Suliffittaani pillugu Sara ima oqaaseqarpoq: “Inuit Ataqatigiit Folketingimi politikkikkut siunnersortitut sulinissanni unamminartussanut nutaanut pissanganartunullu qilanaarpunga folketingimilu ilaasortatta Kalaallit Nunaat pillugu suliaani ingerlaannartumik ikiuinissannut qilanaarlunga”.

Folketingimi ilaasortaq Aaja Chemnitz Larsen pisoq pillugu ima oqarpoq: “Inuit Ataqatigiit Folketingimit Sara Biilmann Egede atorfinitsinnerani iluanaaruteqarput. Sarap suleriaatsit inatsisartut suliaannut tunngasut nalunngilai allaffeqarfimmilu akornatsinni qanoq sulisarnersugut nalunagu. Sara sulilernermini allaffeqarfimmut qanoq naleqarnerulersitsinera qularnanngilluinnarpoq”.

Inuit Ataqatigiit Folketingimi maanna folketingimi ilaasortaq Aaja Chemnitz Larsen, allaffeqarfimmi aqutsisoq Anne-Katrine Brandt Olsen (maanna ernereernerup kingorna sulinngiffeqartoq), politikkikkut siunnersorti Sara Biilmann Egede, ilinniartutut ikiorti Aputsiaq Bourup Lynge aamma ilinniartutut ikiorti Kuluk Møller Haltrup sulisorai.

Print Friendly, PDF & Email