Navigate / search

Inuit Ataqatigiit Folketingimi

Foto: IA Folketingimi
Foto: IA Folketingimi

Inuit Ataqatigiit Folketingimi qinigaaffimmi 2014 – 2018

2001-imi qinersisoqarneraniilli Inuit Ataqatigiit folketingimi ilaasortaatitaqalerpoq. Massakkullu folketingimut ilaasortaavoq Aaja Chemnitz Larsen.

Inuit Ataqatigiinniit Folketingimut ilaasortaq – Aaja Chemnitz Larsen

Aaja Chemnitz Larsen folketingimut qinigaavoq Junip 18-iani 2015, Inuit Ataqatigiit tunuliaqutigalugu ilaasortanngorluni. Aaja siornatigut meeqqat oqaaseqartartuatut sulisimavoq, Kommuneqarfik Sermersuumi pisortatut, FN-imilu Nunat inoqqaavisa ataatsimeersuatarfiata allattoqarfiani sulisimalluni. Aaja IA-mut Inatsisartuni qinigaavoq november 2014-imi, massakkullu Inatsisartunit sulinngiffeqarpoq folketingimi suliani aallunnerorusullugu.

Aaja Chemnitz Larsen-ip ilaasortaaffii: Kalaallit Nunaat pillugu Ataatsimiitsitaliaq, Illersornissamut ataatsimiitsitaliaq, Eqqartuussinermullu Ataatsimiitsitaliaq.

Sinniisuuffigalugillu: Europap Siunnersuisoqatigiivi, Nunat Avannarliit Siunnersuisoqatigiivi, Nunanut allanut politikkikkut ataatsimiitsitaliaq. Saniatigullu Issittumi parlamentarikerit ataavartumik ataatsimiitsitaliaanni (SCPAR) folketingi sinnerlugu sinniisaalluni. Siulersuisunullu nammineq kajumissutsiminik ilaasortaaffigalugit, IKIU – akeqanngitsumik inatsisitigut siunnersuisarfik, taavalu Red Barnet immikkoortortaqarfianni Meeqqat Ikiortigit-mi.

Kalaallit nipaat pituttorsimanngitsoq

Inuit Ataqatigiit-p Folketingimi pingaartippaa politikkikkut qallunaat partiivinut pituttorsimannginnissaq, taamaasillutillu assersuutigalugu taasinissamut nammineq Folketingimi aalajangiisinnaassuseqarlutik. Inuit Ataqatigiit Folketingimi pitsaasumik ammasumillu Folketingimi partiit tamaasa oqaloqatiginissaat kissaatigivaat. Siammasissumik kinguneqartussamillu isumaliornissaq, partiit tamalaat akornanni suleqateqarnissaq, Folketingimi sulianut aalajangersimasunut ingammillu Kalaallit Nunaannut tunngassutilinni suleqataanissaq Inuit Ataqatigiit-mut pingaaruteqarluinnarpoq.

Inuit Ataqatigiit Folketingimi qinersinerni allani

2001-imiit 2007-mut Kuupik Kleist Folketingimut ilaasortaasimavoq. Kuupik taassuma kingorna partiimut siulittaasunngorpoq tassanilu tunuarnissaminut aalajangersimalluni. 2007-imiit 2011-mut Julianne Henningsen Inuit Ataqatigiit folketingimi ilaasortaasimavoq. Julianellu kingorna Sara Olsvig 2011-miit Inuit Ataqatigiit sinnerlugu folketingimi ilaasortanngorluni. Sara 2014-imi Inuit Ataqatigiit-mi siulittaasunngorpoq, folketingimilu suliaminit sulinngiffeqarnissani qinnutigisimallugu. Johan Lund Olsen marloriarluni Sara Olsvigimut sinniisutut folketingimi qinersisoqarnissaata tungaanut ilaasortaasarsimavoq.

Print Friendly, PDF & Email