Navigate / search

Folketingimi praktikkerit

Inuit Ataqatigiit Folketingimi praktikkerfigalugu
Inuit Ataqatigiit Folketingimi suliffeqarfiuvoq allanngorartoq pissanganartuusorlu ullullu assigiinngittaqaat. Maani Kalaallit Nunaat inuiaqatigiinni nunallu assigiinngitsut akornanni sammineqarnissaa sulissutigaarput. Ilinniagartuutut praktikkerninni Folketingimi inatsisartut suliaannut immikkuullarissumik paasisaqassaatit soorlu aamma Kalaallit Nunaanni Danmarkimilu politikkimi pisuni paasisaqassallutit. Praktikkertorinikuusarput ataaseq ilaatigut ima oqaaseqarpoq:

”Suleqatigiinnut ataatsimut siunertalimmut suleqataalluni assut pissanganarpoq. Politikkimut tunngasunik immikkukajaaq ittunik akisussaaffeqarneq, Folketingimilu allattoqarfimmi sulinermik paasisaqarneq assut soqutiginarlunilu nuannerpoq” Tukummeq Riis Berthelsen, pratikkertoq ukiaq 2017

Suliamut piginnaasatit avatagiiseq tamatigoortumi atukkit
Maani praktikkerninni suliassavit ilagissavaat pilersaarusiornermut paasisassarsiornerit, politikkikkut suliat qanimut suliarineri kiisalu naalakkersuisunik ataatsimiisitalianilu pissanganartuni ataatsimeeqataanerit. Saniatigut naatsorsuutigaarput ilinniakkarni piginnaasatit pingasuartumik ajukkunnak atorsinnaagitit.

Ilinniagartuutut praktikkernerni suliappit pingaarnerit ilagissavaat misissueqqissaarnerit Aaja Chemnitz Larsen-illu politikkikkut suliaanik ilungersuussaanillu ingerlateqqiinissaq. Taakku saniatigut allaffeqarfimmi ulluinnarni sulianut ikiuuttassaatit, soorlu ataatsimiinnissanut piareersarnerni pisussanullu piareersarnerni. Politikkimut, attaveqaqatigiinnermut inuiaqatigiillu pissusaannut soqutiginninnissat naatsorsuutigaarput namminersortumik eqeersimaartumillu sulinissat naatsorsuutigalugu. Saniatigut suliffeqarfimmik uummaarissumik suleqatigiinnermut, attaveqaqatigiinnermut sulianullu pikkorissusermik pingaartitsinerput tunniussinnaavarput.

Paasissutissat
Praktikkerneq aningaasarsiassartaqanngilaq sulinerlu sap. akunneranut 35 tiimit missaa annertussuseqassalluni. Sulinissaq sulisunit allanit aaqqissuunneqartassaaq eqaatsumik nikerartumillu sulisinnaanissinnik pisariaqartitsisoqassalluni. Praktikkernissaq 2018-imi aggustip naaneranit 2019 januar-ip naaneranut sivisussuseqassaaq naatsorsuutigaarpullu praktikkernerit ilinniarninni merit-imik pissarsiffissaasinnaassasoq (ECTS) ilinniarnermilu ikiorsiissutinik pisartagaqarsinnaanerit naatsorsuutigalugu. Piffissap ingerlanerani sulinerit nalilerneqartassaaq ingerlaartumillu nalilersorneqassalluni.

Qinnuteqaat piffissarlu killigineqartoq

Qinnuteqaat naatsoq inuunermilu misilittakkat taasassat (CV), nersornaatit karakteerillu uunga nassiunneqassapput: Jens.Heinrich@ft.dk kingusinnerpaamik marlunngorneq maj-ip aallaqqaataat 2018. Qinnuteqaat ”Praktikant”-imik atserneqassaaq. Oqaloqatigiinnerit sap. ak 18-mi 19-milu ingerlanneqarnissaat naatsorsuutigineqarpoq.

Apeqqutissaqaruit politikkikkut siunnersuisoq Jens Heinrich-imut saaffiginninnissamut tikilluaqqusaavutit, tlf. +45 61623005

 

 

Print Friendly, PDF & Email