Navigate / search

Danmarkimi nutserunneqarneq akilertassavarput?

Asseq: Inuit Ataqatigiit Folketingimi

Danskit naalakkersuisuisa ukioq manna aningaasanut inatsimminni oqaatsinut allanut nutserunneqarnermi atuisut akiliisarnissaat siunnersuutigivaat. Kalaalerpaaluit Danmarkimi najugaqartut pisortatigut attaveqartarnerminni nutserisoqarnissartik pisariaqartittarpaat. Taamaattumillu Inuit Ataqatigiinniit folketingimi ilaasortaatitamit Aaja Chemnitz Larsenimit taamatut sukaterinialersaarnerit kalaallinuttaaq Danmarkimiittunut atuutissanersut, pitsaasumillu nutserisoqarsinnaanermik qanoq qulakkeerinnittoqarsinnaanersoq naalakkersuisunut apeqqutigineqarpoq.

Folketingimi ilaasortap piffissami sivisuumi kalaallit Danmarkimi najugaqartut amerliartortut suliniullugit aallussimavai. Kalaallit Danmarkimiittut nutserussunneqarnissaanni pissutsit pillugit Aaja Chemnitz Larsenip ilaatigut Kalaallit Illui nutserussisartullu ataatsimeeqatigisimavai. Ullumikkut kalaallinit Danmarkimiittunit nutserunneqarsinnaanermut neqeroorut atorluarneqartarpoq, taamaattumillu naalakkersuisut atuisut akiliisussaanerannik siunnersuutaat Aaja Chemnitz Larsenip isumakulunnartoqartippaa.

”Oqaatsit ammaasseqataasarput, taamatullu qallunaatut oqaatsit Danmarkimi suliffissarsioraanni imaluunniit ikiuutinik pissarsiniaraanni taamatuttaaq ammaassisuusarput. Taamaattumillu akuulersitsiniarnermi qallunaatut ilinniartinneqarneq pingaaruteqarpoq.” Imalu itisiliivoq: ”Kalaalerpassuilli Danmarkimut nuuttartut qallunaatut oqalunnikkut paasisaqarnissakkullu unammilligaqartuupput, ukiulluunniit arlallit Danmarkimi najugaqarsimagaluarunik. Taamaattumillu nutserussunneqartarnerup pitsanngorsarneqarnissaa, minnerunngitsumillu pisariaqartitsisoqartillugu pitsaasumik nutserusunneqartarnissaq uanni pingaaruteqarpoq. Pisumilu uani sukateriniarnerit nutserunneqarsinnaanermut ajorseriartitsissanngillat, akerlianilli kalaallinut nutserisunut annerusunik piumasaqaateqassaagut, nutserunneqarnermi kalaallit Danmarkimiittut eqqortumik ikiorneqarnissaannut apeqqutaavoq.” Aaja Chemnitz Larsen nassuiaavoq.

Aqutsinermut inatsit naapertorlugu kalaallit Danmarkimi najugaqartut akiliinngikkaluarlutik nutserussunneqarnissaminnut pisinnaatitaaffeqarput.

Folketingimi ilaasortap apeqqutai, kalaallillu nutserunneqartarnerinut tunngatillugu ministerip akissutaa uani takukkit:   http://www.ft.dk/samling/20171/almdel/gru/spm/37/svar/1469315/1862141.pdf aamma http://www.ft.dk/samling/20171/almdel/gru/spm/38/svar/1469243/1861974.pdf

Print Friendly, PDF & Email