Navigate / search

Christiansborgimi unnummi kulturisiorfik: Ileqqutoqqat malillugit nutaamillu puisip amianik ilusilersuinerit takukkit

Asseq: Kopenhagen Fur

Puisip immamit atisaasivimmut ingerlasarnera qanoq isikkoqarpa?

Puisip amia qanoq mutitut atisatullu ilusilersukkatut atasinnaasutut aserujaatsutullu sananeqarsinnaava avatangiisit sapinngisamik annikinnerpaamik mingutsinniassagutsigit?

Apeqqutit tamakku allallu akissutai paaserusukkukkit Inuit Ataqatigiit Folketingimit Great Greenland aamma Kopenhagen Fur ilagalugit unnummut kulturisiorfimmut Christiansborgimi pisussamut qaaqqusineranni akissutissarsisinnaavatit.

Inuit Ataqatigiit Folketingimi ukioq manna unnummi kulturisiorfimmi ileqqutoqqat malillugit nutaamillu atasinnaasumik puisip amianik ilusilersukkat sammissavaat unnummullu Kalaallit Nunaanni puisinniarnermut atasinnaasumut pulaartunut paasititsillutillu eqquiniaasitsiniarput.

”Christiansborgimi kisitta kalaallini partiiulluta pingaartipparput Kalaallit Nunaat mutiusoq ilisimatissallugu puisillu amianik atuineq ileqqutoqqat malillugit ingerlasartoq siaruartissallugu pingaartipparput. Kalaallisuut ass. kulturikkut politikkikkut ilisarnaataapput Kalaallit Nunaanniillu ilusilersuisartutsinnit amerlasuunit isumassarsiorfiisarnikuullutik. Oqaluttuaq taanna nuannerluinnartoq oqaluttuaralugulu siaruarterusupparput”, Inuit Ataqatigiinni Folketingimi ilaasortap, Aaja Chemnitz Larsenip, unnummi kulturisiorfimmi ukioq manna sammineqartussaq pillugu oqarpoq.

Aaja Chemnitz Larsenip unnuk kulturisiorfik peqqutigalugu nammineq kalaallisuuni saqqummiutissallugit aaliangersimavaa kalaallisuullu arnanit arfineq-marlunnit Kalaallit Nunaanneersunit mersorneqareerluni naammasseqqammerput. Unnummi kulturisiorfimmi taammaammat pulaartut kalaallit kalaallisuui qanoq sananeqartarneri immikkuullarissumik paasisaqarfigisinnaavaat.

Puisip amianik nutaamik ileqqutoqqallu malillugit takusaqarneq eqqaassanngikkaanni pulaartut aamma #sælfie-mik puisip amiinik kusanartunik ilusilersukkanik atorlutik assilitissinnaapput ilusilersuisartullu puisip amiinik Kalaallit Nunaanneersunik atuisarnerannik video-nik takusaqarsinnaallutik. Taakku saniatigut unnummi apeqqarissaartuni Kalaallit Nunaanni puisinniartarneq pillugu apeqqarissaarnermi eqquisunut puisip amiinik sanaanik eqquisoqarsinnaavoq.

Aggialluarisi!

Print Friendly, PDF & Email