Navigate / search

Asiip tunuarneratigut naalakkersuinikkut isumassarsiorfik annertoqisoq politikererlu pikkorilluinnartoq annaavarput

Asseq: Inuit Ataqatigiit Folketingmi

Ullumikkut Kommuneqarfik Sermersuumi borgmesterip Asii Chemnitz Narupip atuuffimminit tunuarnini nalunaarutigivaa. Tamanna Folketingimut qinigaaqqittup Aaja Chemnitz Larsenip uggorivaa, Asiillu tunuarnera Inuit Ataqatigiinnut Kalaallit Nunaannullu tamarmut annaasaqaatitut isigalugu.

Kommuneqarfik Sermersuumi borgmesterip atuuffimminit tunuarluni nalunaaruteqarnera Aaja Chemnitz Larsenip Christiansborgimiit uggorivaa. Folketingimi ilaasortap Asii Chemnitz Narup ukiorpassuarni naalakkersuinikkut qanimut suleqatigisimavaa.

Asiip tunuarnera Kalaallit Nunaanni naalakkersuinikkut initoorujussuussaaq. Nersornarluinnartumik naalakkersuinikkut suliaqarsimavoq, Inuit Ataqatigiinnut nunatsinnullu annertuumik pingaaruteqarsimalluni. Naalakkersuinikkut siuttuusimanera sulisimaneralu ullumikkut allani takusassaanngilluinnartuuvoq. Asii Kommuneqarfik Sermersuumiinnaq borgmesteriusimanngilaq, isumagali naapertorlugu Kalaallit Nunaata tamarmiusup ineriartornissaanut pingaarnertut qimuttuusimalluni, aqqutit nutaat misilinneqarsimanngitsut annertuunillu anguniagarfiusut atornissaannut qununngisaannarsimalluni. Tamanna illoqarfiit pingaarnersaannuinnaq iluaqutaanani Kalaallit Nunaannut tamarmut siuarsaanikkut ineriartornikkullu iluaqutaasimavoq. Tamanna kingullertigut Siorarsiorfimmut atatillugu takuarput. Angorusutat annertuut takorluukkallu pingaaruteqarput, aamma eqqaq anorersuaraluarpalluunniit. Asiip naalakkersuinikkut sapiissuseq pigisimavaa, annertuumik isumassarsiorfiuvoq inuullunilu assut asannittoq, politikkimilu maqaasissaqaara.” Aaja Chemnitz Larsen oqarpoq.

Pisup matuma ingerlarngatigut politikkip qanoq ipertutigisinnaassusia takuarput, aammalu inuusuttut nutaanik nukissallit pikkorissullu, imminnut nittarsaannissaq piinnarnagu pitsanngorsaanissaq siunertaralugu inuiaqatigiit pillugit politikkitigut peqataarusuttut qanoq pisariaqartitsigalutigit paasivarput. Matuma ingerlarnga Asiip eqqaamaneqaatigissanngilaa. Naak pisup ingerlarnga kusanaakkaluaqisoq, Asiip naalakkersuinikkut sulisimanera nersornartutut eqqaamassavarput.

”Asiip tunuarnera immitsinnut qanillinerunissatsinnik takutitsivoq aammalu Kommuneqarfik Sermersuumut Kalaallit Nunaannullu takorluugarpassui pitsaasut angutserlugit suli sulinerunissatsinnik takutitsilluni. Anguniakkat taakkua Inuit Ataqatigiinnittaaq anguniagarivagut, naallu annaasarput annertugaluaqisoq naggataatigut nukittunerulluta anillannissarput qularutiginngilara. Aqutsinerup pitsaanerusup, paasiuminarnerusup, politikkikkut suleqatigiiffiunerusup kiisalu inuiaqatigiit pitsaanerusut, toqqissisimanerusut pisuujunerusullu angunissaannut suli sorsuuteqarnerunissamik pisariaqartitsineq annertuneruliinnarpoq. Immitsinnut uparuartuutiinnarneq qimallugu kommunit, Naalakkersuisut Folketingillu akornanni meeqqat innuttaasullu pillugit naalakkersuinikkut suliassagut naammassisariaqarpagut. Asiip naalakkersuinikkut siuttuusimanera pillugu annertungaartumik ataqqivara. Asii Chemnitz Narup siunissami sutigut tamatigut ajunnginnerpaanik kissaappara”.

Print Friendly, PDF & Email