Navigate / search

Aningaasanut ministerit ataatsimiinnerat: Aaja KL-ip isumaqatigiissutaanni kalaallit ilanngunneqarnissaannik siunnersuuteqarpoq

Asseq: Inuit Ataqatigiit Folketingimi

Danmarkimi kalaallit illuutaasa innuttaasut Kalaallit Nunaanniit Danmarkimut nuuttartut amerliartornerat ukiut tamaasa misigisarpaat. Ajornartorsiut tamanna ullumikkuttaaq eqqartorneqarpoq, tassanilu folketingimi ilaasortap Aaja Chemnitz Larsenip (IA) aningaasanut ministeri Kristian Jensen (V) naapippaa, kalaallinut Danmarkimiittunut annertunerusumik iliuuseqartoqarnissaa eqqartorneqarluni.

Ataatsimiinnermi , naalakkersuisut Kommunernes Landsforeningimut (KL) ukiumoortumik isumaqatigiissutaanni kalaallinut Danmarkimiittunut kommunit suliniuteqartarnissaat pillugu Aaja Chemnitz Larsenip aningaasanut ministerimut kaammattuutigivaa. Pingaartumik inunnut isumaginninnermut suliffissaqartitsinissamullu tunngasut kommuneni ataatsimut eqqarsaatigineqartarnissaannik folketingimi ilaasortaq kajumissaarivoq.

”Kalaallit Danmarkimiittut amerlanerpaartaat danskini inuiaqatigiinni iluaqutaalluartuupput, tamannalu ministerimit uppernarsarneqarpoq. Kalaallit ingerlalluartut amerlinerunissaat amerlanerillu sulilernissaat kissaatigivara. Kommuniniit kalaallit ullumikkut suliffeqanngitsut suliffissaasigut nukittorsaavigineqartariaqarput. Tamassuma politikkikkut qulakkeerneqarnissaa soqutigineqartariaqarpoq.” Imalu itisiliivoq: ”Naalakkersuisut ukiumoortumik KL-mut isumaqatigiissusiortarput, tassanilu kalaallit sumi tamani danskit kommuuniini najugaqartut suliffissaasigut annertusaaviginissaannut eqqarsartoqarnissaa piukkunnarluinnarpoq. Maanna naalakkersuisut KL-lu isumaqatigiinnialeruttorput, taamaattumillu naalakkersuisut kalaallinut iliuusissiaasa kommuninut tamanut siaruarternissaat Inuit Ataqatigiinniit piffissaq ungasinnerusoq eqqarsaatigalugu anguniarparput.” Aaja Chemnitz Larsen, Inuit Ataqatigiinneersoq oqarpoq.

Kalaallit Danmarkimi najugaqartut katillugit 16.000-iusut inissisimanermikkut assigiinngissitaaqaat. 80%-ii ingerlalluartuupput, kisitsisit kingulliit naapertorlugit 6-20%-ii inuuniarnermikkut ajornartorsiuteqartuullutik. Den Nordatlantiske Gruppe-miit kisitsisit naapertorlugit 50%-it suliffeqartuupput. Siorna Inuit Ataqatigiit Folketingimiit politikkikkut siunnersuuteqarpugut, tassanilu naalakkersuisut kommunillu kalaallinut Danmarkimiittunut ingerlalluartunut ajornartorsiortunullu sullissinerminni qanoq pitsanngorsaasinnaanerannut tigussaasunik siunnersuuteqarpugut.

Siunnersuuteqareernermi folketingimi ilaasortap Aaja Chemnitz Larsenip ministerit arlallit ataatsimeeqatigisarsimavai, ilaatigut kultureqarnermut ilinniartitaanermullu ministeri, taakkualu Kalaallit Nunaannut kalaallinullu Danmarkimiittunut sullissinikkut qanoq annertusaaneqarsinnaanerannik eqqartueqatigisimavai. Junip naalernerani Aaja Chemnitz Larsenip suliffeqarnermut ministeri Troels Lund Poulsen (V) ataatsimeeqatigissavaa, tassanilu suliffinnut suliffeqartitsinermullu ajornartorsiutit eqqartorneqassapput.

Print Friendly, PDF & Email