Navigate / search

Aajap suliassat Danmarkimiittut assigiinngitsut inooqatigiinnut tunngasut pulaarpai

 

Inuit Ataqatigiinnit Folketingimi ilaasortaq Aaja Chemnitz Larseni ukiup affaata ingerlanerani Danmarkimi inooqatigiinnut suliassat assigiinngitsut pulaartarnikuuai. Perorsaaviit ulluinnarni Danmarkimi kalaallinik atugarliortunik sullissisarput Folketingimilu ilaasortap sumiiffiit taakku pulaassallugit pingaartissimavaa Folketingimi akiligassat qaffasissusaannik agguagassanik isumaqatigiinniarnernut isumassarsinissani anguniarlugu.

”Uannut pingaaruteqarpoq inuit taakku naapissallugit tassaammata taakku atugarliortuusut kalaallinillu atugarliortunik ulluinnarni sullissisuusut. Anguniarpara ineriartorneq malinnaavigissallugu qanorlu ilillunga anguniakkat Folketingimi naammassineqassanersut paasissallugu anguniarlugu. Uani pingaaruteqartoq tassaavoq kalaallinut Danmarkimi najugalinnut politikkikkut aaliangiussat malugineqarsinnaanissai”, Folketingimi ilaasortaq oqarpoq.

Folketingimi ilaasortap pulaarnermini unammillernartut assigiinngitsut naapittarsimavai, taakkulu kalaallinit atugarliortunit misigineqartarput; assersuutigalugu atornerluinermut tunngasut, ineqarnermut- angerlarsimaffeqannginnermullu tunngasut, soorlu aamma persuttaanernut, ilinniarfissanut- aamma suliffissanut nassaarneq ajulernermut tunngasuullutik. Pingaartumik aamma erserpoq kalaallit Danmarkimi atugarliortuusut amerliartorneri inuusunneruleriartornerilu malunnarlutik, tamannalu ajornakusoortitsisarpoq:

“Pulaarninni takusarpakka kalaallit Danmarkimi atugarliortut inuusunneruleraluttuinnartut nooqqammisullu toqqaannartumik atornerluinermut pisarput. Inooqatigiinnerup tungaatigut kinguarnermik kinguneqartarpoq kalaallit inuusuttut atugarliortut Kalaallit Nunaannit Danmarkimut nuukkaangata inooqatigiinnilu inissisimaffii ajornerulertarlutik. Tamakku saniatigut kalaallit inuusuttut ikiaroornartunik sakkortuunik pisartut amerliartorput ilaalu toqussutigisarlugu, pingaartumik Københavnimi. Pissutsit taakku naliginnaaqqajaalerneri annilaarnartuuvoq suliarisariaqartoq. Taamaammat inuit assigiinngitsut Kalaallit Nunaanni kommuunit akornanni suleqatigiilluarnerulernissamik kissaateqarput ajornartorsiummik suliniummik aallartitsiaartalernissaq anguniarlugu. Kalaallit Nunaannit akisussaaqataanermik takutitsinissaq pingaaruteqarpoq ineriartorneq tamanna unitsissagutsigu. Kalaallit Nunaat Danmarkillu akornanni killeqanngitsumik pissutsit ingerlapput, Kalaallit Nunaanniilli Danmarkimi atugarliortutut ikiorserneqarnissaat qanoq ajornartigisoq paasissutissiissutigisariaqarparput. Angerlarsimaffimmik suliffissamillu peqareertinnani nuunniaraanni pilluarneq anguneqarnavianngilaq. Taamaakkaluartorli suliniutit assigiinngitsut peqatigiiffiillu assigiinngitsut tamarmiullutik atugarliortut inuunermik nuannernerusumik inuuneqalernissaat suliarujussuusoq sulissutigigaat takullugu nuannerpoq”, Aaja Chemnitz Larseni oqarpoq.

Aaja Chemnitz Larsenip nunami maani pulaaqattaarnera uninngilaq septemberimilu assersuutigalugu Aalborgimi Københavnimilu inooqatigiinnut tunngasut neqeroorutaasut pulaassallugit.

Akiligassat qaffasissusaannik agguagassanik isumaqatigiinniarnerit Folketingip ukiata aallartinnerani oktoberip aappaannit suliarineqarnissaat naatsorsuutigineqarpoq.

Print Friendly, PDF & Email