Navigate / search

AAJAP PAASISSUTISSIIARTORLUNI ANGALANISSANI AALLARNISALERPAA

Foto: Inuit Ataqatigiit Folketingimi

Inuit Ataqatigiit Folketingimi ilaasortaatitaa Aaja Chemnitz Larsen paasissutissiiartorluni Kalaallit Nunaaliaruni ulluni tullittuni oqaloqatigiinneq politikkimullu tunngasutigut sammisaqarneq aallutissavai. Aaja nunatta kitaata kujasinnerusortaanut angalassaaq, Paamiut, Arsuk, Nanortalik aamma Qaqortoq tikissallugit. 2015-imiilli folketingimi sulilerami Kalaallit Nunaanni nunaqarfiit illoqarfiillu 16-it tikittarsimavai, tikeraarnerit ilarpassui tassaasimallutik paasissutissiiartornerit. Angalanerni suliat kalaallinut pingaaruteqartut paasissutissiissutigineqartarput, Aajallu folketingimi sulianut kalaallit peqataatinneqarnissaasa pingaaruteqarnerat naqissuserpaa.

”Folketingimi suliannut tunngasunik innuttaasut avitseqatigalugit paasissutissiiartornissannut qilanaarpunga, tassuunatigullu aamma innuttaasut suliannut tunngasutigut tunniussaqarsinnaapput. Politikkimi kalaallit innuttaasut sullinneqarlutillu pineqarput, Christiansborgimilu aalajagikkat inuit inuunerinut toqqaannartumik sunniuteqartarput. Assersuutigalugu inatsisinik atuutsitsinermut tunngasutigut isertitsivittaassap inissiisarfinni nakkutilliisut sulinerminni atugaasigut sunniuteqarfigissagai. Aamma Danmarkip akisussaaffigisaatut nunap assiliornerit ullunut nutaaliaasunut naleqquttunngorlugit nutarterneqarnissaannut tunngasut taaneqarsinnaapput – minnerunngitsumik imaatigut angallannerup isumannaatsuunerunissaa eqqarsaatigalugu. Pisani ukunani innuttaasut isumaannik tusarnissaq peqataatitsinissarlu pingaartippakka. Taamaasillunga kalaallit sinnerlugit folketingimi issiasutut Kalaallit Nunaannut iluaqusiinerpaasussamik  politikkikkut sulissutiginnissinnaanerussaanga”, Aaja Chemnitz Larsen oqarpoq.

Aaja Chemnitz Larsenip paasissutissiiartorluni angalanini marlunngorpat aallartissavaa. Tikiffimminilu tamanit peqataaffigineqarsinnaasunik innuttaasunik ataatsimiisitsisassaaq.

Innuttaasunik ataatsimiititsinerit:

Arsuk: Juunip arfernani nal. 19 Arsuup atuarfiani

Paamiut: Juunip arfineq-aappaani nal. 19 Majoriami

Nanortalik: Juunip qulingiluaani nal. 19 Nanortallip Atuarfiani

Print Friendly, PDF & Email