Navigate / search

Aajap kalaallit eqqumiitsuliornikkut suleqatigiissutaat nutaaq ARoS-imi ammarpaa

Asseq: DGH Aarhus

Pingasunngornermi 3. maj 2017-imi eqqumiitsulianut katersugaasiviup ARoS-ip Aarhusimilu Kalaallit Illuata ingerlassaq Nukiga aqqutigalugu suleqatigiissutaat aallarnerneqarpoq. Aallarnigaq Aarhusip europami kulturikkut illoqarfittut pingaarnersatut 2017-imi inissisimaneranut atatillugu suliaavoq. Ammaanersiornermi Inuit Ataqatigiit folketingimi ilaasartaatitaat Aaja Chemnitz Larsen peqataavoq, tassanilu eqqumiitsuliornerup inuiaqatigiit ineriartortinneqarneranni kulturillu assigiinngitsut akornanni atassusiisinnaaneranut tunngatillugu saqqumiussaqarpoq.

ARoS-ip Aarhusimilu Kalaallit Illuata suleqatigiinneranni Kalaallit Nunaat kalaallillu pillugit nutaanik oqaluttuussinissaq siunertaavoq. Tamannalu kalaallit eqqumiitsuliaannut kulturiannullu tunngatillugu Aaja Chemnitz Larsenip piffissami sivisujaami aallussisimaneranut naapertuuppoq.

Aaja Chemnitz Larsen itisiliivoq: ”Eqqumiitsuliortut inuiaqatigiinni oqaasissaqartuusarput oqaluuserissallugit artornartunik oqallitsitsisinnaasarlutik, taamaasillutillu inuiaqatigiinni allanngueqataasinnaasarlutik”.

Aaja Chemnitz Larsenip Kalaallit Nunaanni Danmarkimilu kulturministerit arlalissuit ataatsimeeqatigisarnerisigut kalaallit eqqumiitsuliaasa qanoq atorluarneqarsinnaanerinut, taamatullu nutaamik paasinninnissamut paasisaqarnissamullu aqqutaasinnaanerinut tunngasutigut oqariartuutigisarpai. Eqqumiitsuliornerup periarfissaasa unammillernartuisalu paasiniarnissaat pillugit Aajap kalaallit eqqumiitsuliortui qaaqqullugit oqaloqatigisimavai.

Aajap eqqumiitsuliorneq pillugu suleqatigiinneq nuannaarutigivaa imalu isumaqarluni: ”Eqqumiitsuliat kulturilu kingulliuttariaqanngillat, akerlianilli Kalaallit Nunaat nutaaliaasoq pillugu pitsaasumik nutaanillu oqaluttuussinermi peqataatinneqarnerusinnaallutik. Eqqumiitsuliorneq inuussutissarsiutinut nunanullu allanut politikkimut akuutinneqartariaqarpoq, tassami politikkimut sanilliutissagaanni Kalaallit Nunaata Danmarkillu, nunarsuullu sinneranut atassusiinissamut aqqutissaqqinnerusinnaammat.”

Suleqatigiissut Nukiga piffissami sivisujaami atuutissaaq. Taamaasilluni 4. maj kalaallit tusarnaartitsissapput kiisalu 20. aamma 21. maj festivaleeeraqassalluni qulequtalimmik ”Kalaallit Nunaat pillugu oqaluttuassat nutaat – kalaallit kulturikkut mumisitsinerat”, tassanilu kalaallit eqqumiitsuliortut assigiinngitsutigut suliaminnik anguniakkaminnillu oqaluttuussissapput.

Suleqatigiinneq pillugu uani atuarit:

http://www.groenlandskehus.dk/aktiviteter/

http://www.aros.dk/kalender/kal/#event –  AROS PUBLIC: SEMINAR OM “DEN GRØNLANDSKE KULTURREVOLUTION”, ” Kalaallit kulturikkut mumisitsinerat” pillugu isumasioqatigiisitsineq.

Print Friendly, PDF & Email