Navigate / search

Aajap Illersornissaqarfiup Arsummi torersaanera suliaqarneralu ammanerusumik eqqartorneqarnissaa anguniarpaa

 

Inuit Ataqatigiinni folketingimi ilaasortap Aaja Chemnitz Larsenip Arsummi innuttaasut Illersornissaqarfimmit tusaajumaneqannginnermik peqataatinneqannginnerunermillu pakatsillutik oqaasii paasisinnaavai. Folketingimi ilaasortap siusinnerusukkut Forsvarsministerimut ernumassutini oqaatigereernikuuai maannalu Grønnedal-imi torersaanermut pilersaarummut ammanerusumik ingerlatsisoqarnissaa kissaatigalugu.

 

Arsummi innuttaasut piffissami kingullermi Arsuup kangerluani Illersornissaqarfiup suliaannut pakatsinertik ernumanertillu eqqartullattaanikuuaat. Tassani ilaatigut ooqattaasoqartarnera innuttaasut piniarnissaminnut periarfissaannut sunniuteqartarsimapput. Inuit Ataqatigiinnit Folketingimi ilaasortap Aaja Chemnitz Larsenip Arsummi junimi 2018-imi innuttaasunut ataatsimiisitsimmat innuttaasunit ajornartorsiutit taakku aamma qaqinneqarput. Sakkutuutut sungiusarnermi pinngortitaq aamma eqqugaavoq, tassa savimerngit, aqerlut atortullu qangarnitsat Grønnedalip eqqaanut immamut iginneqartarmata. Folketingimi ilaasortaq nangilluni ima oqarpoq:

 

”Junimi ukioq kingulleq Arsummiikkama innuttaasunit Illersornissaqarfiup suliaannut ernumaneq ersarissumik malugisinnaanikuuara. Inuiaqatigiit ikitsunnguupput piniarnermik aalisarnermillu ingerlatsinissamik pisariaqartitsilluinnarlutik. Taamaammat innuttaasut inooriaasaat piniarnissamullu periarfissaat killeqalerneri akueriinnarneqassanngillat. Nuannaarutigaara Arktisk Kommando-mit maanna Arsummi innuttaasunut ataatsimiisitsisoqarmat, taamaattorli neriorsuutit eqquutsinneqarnissai pingaaruteqarput. Taakku tunuliaqutigalugit Grønnedal-imi torersaanerup pilersaarusiorneqarnera pillugu paasisaqarusuppunga pinngortitamullu tunngatillugu isumaqatigiittoqarnissaa kissaatigalugu.”, folketingimi ilaasortaq oqarpoq.

 

Arktisk Kommando-mit innuttaasut ernumassutaat tusaaneqarsimaneri oqaatigineqarpoq suliallu ingerlanneqarnissaat nalunaarutigineqarluni. Qallunaat Naalakkersuisuinit suliani Grønnedalip naleqquttumik sulianut atorneqarnissaa oqaatigineqareernikuuvoq, taamaammallu folketingimi ilaasortamit ooqattaarfittut atorneqartarnera tupigusuutigineqarluni.

 

”Qallunaat Naalakkersuisuisa torersaanissaq tuaviuutiginikooqaat sumiiffiullu takornarianut atorneqarnissaanut kissaatigineqarnera akuerinikuunagu. Grønnedal-imi naleqquttumik Arktisk Kommando-mi sulianut atorneqarnissaanut aaliangiinerup kingorna torersaanerup killiffianut paasisassat annikinnikooqaat. Aallarteqqaaramik tuaviussatut ingerlappaat maannali unittoorsimallutik pisullu Arsummi innuttaasunik akerlereeqatigiinnermik kinguneqarlutik. Ineriartorneq taamatut ingerlaqqunanngeqaaq sakkortuumillu Arsuup kangerlua pillugu isumaqatigiinniarnermik ingerlasoqarnissaanik kaammattuivunga Arsummi innuttaasut Arktisk Kommando-milu sulisut piumasaat piviusunngortinneqarniassammata.”, Aaja Chemnitz Larseni naggasiivoq.

Print Friendly, PDF & Email