Navigate / search

Aajap Danmarkimi angalaartarnermini kalaallit hornurujulikkaartut naapittarsimavai

 

Inuit Ataqatigiit Folketingimi ilaasortaatitaat Aaja Chemnitz Larsen Esbjergimi innuttaasunik ataatsimiititseqqammerpoq, taamaasillunilu qaammatit marluk ingerlaneranni illoqarfiit arfineq-pingajussaat innuttaasunik ataatsimiititsiffigisimavaa. Sumiiffiit ilarpassui arlaleriarluni tikittarsimavai.

Aaja Chemnitz Larsenip kalaalerpassuit Danmarkimi najugaqartut ataatsimeeqatigiartortarsimavai. Kalaallit affangajaat danskit illoqarfiini annerni tallimaasuni najugaqartuupput, taamaattumillu kalaallit minnerusumiittut, Bornholmimi, Silkeborgimi, Vejlemi aamma Viborgimi aammattaaq tikinnissaat pingaartinneqarsimapput. Folketingimi ilaasortap kalaallit peqatigiiffii innuttaasullu nunatsinneersut imaluunniit allat Kalaallit Nunaannut atassuteqarluartuusut naapittarsimavai.

”Politikki ineriartortuartuuvoq taamaattumillu innuttaasut inuuniviat aallussaallu tikillugit tusarfiginissaat pingaaruteqarpoq. Ukiuni kingullerni sisamani Kalaallit Nunaata kalaallillu Danmarkimiittut iluaqutissartaasigut aatsaat taamak angusarissaarsimatigivugut. Sulilu sorsuutissaqaqaagut.”, Aaja oqaluttuarpoq.

Sammisaq pingaarneq tassaasimavoq ”Danmarkimi inuuneq”, tassani unammilligassat suunersut, nuannaarutit, kulturikkut allassarnerit il.il. eqqartorneqartarsimallutik. Ilaannut kalaallinut taamaassorinninnerit initunerusartut, allat Kalaallit Nunaannut tunngasutigut ilisimasaqarnerulersimaneq malugisarpaat, tassani ilaatigut kalaallit qallunaallu inuusuttaasa peqataaffigisaanni Operation Dagsværkimi Kalaallit Nunaannik aallussisimaneq tunngaviulluni.

”Assersuutigalugu Aarhusimi ilinniartutut inuuneq eqqartorparput. Ataatsimut isigalugu ilinniartunut atugassarititat pitsaasuupput, sulili ilinniakkaminnik taamaatitsiinnartartut amerlavallaarput, tamannalu allannguiffigeqataarusupparput.  Assersuutigalugu ilaqutariinnik tulaavissanik aaqqissuussineq illinniartut ilinniakkaminnik aallartinneranni iluaqutaasussaq pilersilerparput. Taamatuttaarlu inuit atugaasigut pitsaanerusunik iliuuseqarnissat sorsuutigivagut, innuttaasullu qajannaateqarlutik Danmarkimut tikittartut tikinnerini isumassuinerit pitsanngorsarnissaat nutaanik siunnersuuteqarfigissavagut.” Aaja Chemnitz Larsen naggasiivoq.

Februarip aallartinnerani Aaja Kalaallit Nunaaliassaaq, tassanilu ilaatigut Tasiilami innuttaasunik ataatsimiisitsissaaq. 2018-imi Nunatta Kujataani ataatsimiisitsivoq, tamannalu sioqqullu Avannaani illoqarfinni nunaqarfinnilu innuttaasunik ataatsimiisitsisarsimavortaaq.

Print Friendly, PDF & Email