Navigate / search

Aaja: USA’p kisiartaalluni isummersuutai akuersaanngilagut

Silaannaap allanngoriartornerata kingunerinik ataatsimut annikillisaanissaq pillugu nunarsuatsinni nunat amerlanersaasa Parisimi isumaqatigiissut ilannguffigisimavaat.

Inuit Ataqatigiit isumaqarput nunani issittuni nunat klima pillugu politikkikkut ersarissumik iliuuseqarnissaminnut pisariaqartitsisut, nunammi taakkuupput silaannaap allanngoriartorneranit sakkortunerpaamik eqqugaasut. Attanneqarsinnaasumik inuussutissarsiutitigut ineriartortitsineq nunarsuatta paarilluarnissaanut peqatigitinneqarsinnaavoq.

Massa issittumi silaannaq nunarsuup sinneranut sanilliullugu marloriaammik sukkatigisumik kissakkiartortoq, USA silaannaap allanngoriartuutaasa inunnit pinngortissimaneqarnerannik upperinninngittuarsinnarpoq, kingunerillu annertoqisut sumi tamani takussaapput. Taamatut USA-p kisiartaalluni isumaqarnera kingullertigut qanittukkut Finlandimi Arktisk Rådi ataatsimiimmat takuarput.

Arktisk Rådip tunngaviusumik piginnaatitaanerisa pingasuusut ilaat marluk avatangiisinik illersuinissamut piujuartitsisumillu ineriartortitsinissamut tunngasuupput. Naalagaaffiit arfineq-pingasut peqataasut akornanniipput nunarsuatsinni naalagaaffissuit – taamaattumillu Issittumi klima pillugu politikkitigut ataatsimoortumik iliuuseqarnissaq inissaminiippoq.

Kalaallit Nunaanniit Danmarkimiillu USA-p kisimiilluni miserratiginninnera taamaasillunilu Arktisk Rådimi sulianut akornusersuinera isiginnaaginnarsinnaanngilarput. Finlandimi ataatsimiinnerup ersarissumik takutippaa, Issittumi klima pillugu ataatsimoortumik pilersaarusiukkamillu iliuuseqartoqartariaqartoq.

Naalagaaffeqatigiinni Kalaallit Nunaanni innuttaasukkaartumik mingutsitsinerpaajuvugut, kisimiillutali iliuuserisinnaasagut killeqarput. Amerikkarmiut isumaat kalaallittaaq naalakkersuisuini qanittoq tikillugu isumagineqarpoq, taamaattoqarneranilu klimap allanngoriartorneranut ilisimasat annertusarneqarnissaannik pisariaqartitsisoqartoq naqissuserneqarpoq.

Kalaallit Nunaata Danmarkillu Arktisk Rådimi klima pillugu iliuuseqarnissaat Folketingimi sulissutigissavara.

 

Print Friendly, PDF & Email