Navigate / search

Aaja: Umiartortut atorfimminni ersarissunik pisinnaatitaaffeqassapput – tamanna Naalakkersuisut aalajangissavaat

Asseq: Inuit Ataqatigiit Folketingimi

Aalisarneq inuussutissarsiutitsinni pingaarnersaavoq tusinderpassuarnillu suliffissaqartitsisuulluni. Taamaakkaluartorli imarsiornermi atorfilinnut sammisani arlalinni ersarissunik pisinnaatitaaffeqartoqanngilaq, tamannalu suliffeqarfeqarfimmut pitsaasumut ajoqusiisinnaasoq, Folketingimi ilaasortaq Aaja Chemnitz Larsen isumaqarpoq.

Qanittukkut folketingimi ilaasortaq Aaja Chemnitz Larsen inuussutissarsiornermut ministerimit Brian Mikkelsenimit imarsiortut sulinerminni pisinnaatitaaffiinut tunngasumik akissutisivoq, tassanilu ministerimit uppernarsarneqarpoq Kalaallit Nunaanni namminersortuni akissaatitigut atorfeqarnermilu atugassarititatigut aalajangersaanissaq 1985-mi nunatsinnut angerlaanneqarsimasoq. Allatut oqaatigalugu imarsiortut atorfeqarnermikkut pisinnaatitaaffiisa naleqqussarneqarnissaannut pitsanngorsaanissaq pisariaqartinneqarpoq.

Taamaattumik Aaja Chemnitz Larseni isumaqarpoq, naalakkersuisooqatigiit sulisitsisutut aalisartut tunngaviusumik pisinnaatitaaffiinik qulakkeerinninnissaq sulissutigisariaqaraat: ”Naalakkersuisut nutaat aalisarnermi pisariaqartunik sinaakkusiinissaq kissaatigippassuk, aalisartut atorfeqarnikkut pisinnaatitaaffiinik inatsisitigut qulakkeerinninnissaannik sakkortuumik inakkusuppakka”, folketingimi ilaasortaq oqarpoq.

Soorlu ministerimiit akissummiittoq, kalaallit ILO-konventionimik, isumaqatigiissummik, malinninnissaannut Naalakkersuisut Søfartsstyrelsimiit ikiorumaneqarsimapput. ILO tassaavoq FN-ip suliffeqarfeqarnermut apeqqutini isumaginnittoqartarfia, sulisut pisinnaatitaaffiisa siuarsarnissaannik sulissutiginnittoq. Kalaallit tassannga malinnippata aalisartut aalisarnerup iluani atorfeqarnermikkut piviusunik pisinnaatitaaffeqalissapput.

”Aalisarneq nunatta aningaasaqarnerani tunngaviuvoq. Taamaattumik inuussutissarsiut tamanna suli pilerinartooqqullugu aalisartut pisinnaatitaaffiisa qulakkeerneqarnissaat pingaaruteqarpoq. Uanilu inuussutissarsiut ILO-p isumaqatigiissutaatigut qulakkeerneqarsinnaavoq. Aalisarnikkut inuussutissarsiummi pitsaanerpaami ingerlalluartumilu sulisut isumannaarneqarnissaattaaq ilaavoq” Aaja Chemnitz Larsen oqarpoq.

Imarsiornermulli pisat ataasiakkaat suli naalagaaffiup ataaniipput, uanilu pisap iluani aalajangersaanissami Søfartsstyrelsemiit ikiuukkusuttoqarpoq. Aalajangersakkallu taakkua nunatsinni peqqussutitigut atuutilersinneqassapput. Susassaqarfik naalagaaffiup ataaniittoq tassaavoq umiarsuarni aquttut pissuserissaarnermik attassinissaannut kiisalu umiarsuarmi pinerluttoqartillugu pisussaaffiinut tunngasoq.
Naalakkersuisut peqqussutip nunatsinni atuutilersinneqarnissaanik danskit naalakkersuisuinut qinnuteqareerpata, taava folketingimi ilaasortaq Aaja Chemnitz Larsen umiartortut sulinerminni pisinnaatitaaffiisa naalagaaffiup ataaniittut Folketingimi salliutinneqarnissaannut uteriisissaaq.

Print Friendly, PDF & Email