Navigate / search

Aaja udenrigsministerimut: Kalaallit Nunaat Danmarkillu akornanni ammaneruneq matoqqanermut sanilliullugu tatigeqatigiissitsinerulertarpoq

Inuit Ataqatigiinnit Folketingimi ilaasortap ullumi Udenrigsministeri Anders Samuelseni naapeqatigaa. Folketingimi ilaasortap akimut ersittuunissaq qanoq pingaaruteqartiginersoq erseqqissarpaa piffissami Kalaallit Nunaat nunanit allanit soqutigineqarujussuarnerani Folketingimi ilaasortat kalaallit peqataatittarnissaanut pisariaqartitsisoqarnera erseqqissaatigalugu oqaatigeqqippaa.

 

Ullormut Udenrigsministerilu naapinnermi nunanit allanit Kalaallit Nunaat soqutigineqarnera immikkut inuussutissarsiornerup aamma aatsitassarsiornerup iluani ataqatigiinnermut aqqutissarsiuinerit ukkatarineqarput. Aaja Chemnitz Larseni nunanut allanut- aamma isumannaallisaanermut politikkimik sanngisuumik pisariaqartitsisoqarnera ersarissumik oqaatigaa ataatsikkullu erseqqissarlugu Danmarkimit nunanut allanut- aamma isumannaallisaanermut Kalaallit Nunaanni akisussaaffeqartumit Folketingimi peqataatitsisoqarnerusoqartarnissaa pingaaruteqartoq oqaatigalugu.

 

Danmarki Kalaallit Nunaallu oqaluttuarisaaqatigiinneri ajoraluartumik nuanniitsumik qileroqarpoq Kalaallit Nunaat aaliangiinerni pingaarutilinni peqataatinneqartarneri annikinnikooqimmata. Danmarkimut atassuterput ajornerulissanngippat Danmarkimi inatsisartut folketingimi ilaasortat kalaallit peqataatinnerusariaqarpaat. Pingaartumik maannakkut nunat, soorlu USA aamma Kina Kalaallit Nunaata ineriartorneranut ilaarusuttut eqqarsaatigissagaanni. Folketingimi Kalaallit Nunaannit sinniisutut inissisimaninni naatsorsuutigaara peqataatinneruneqassasugut – taamatut pisoqanngippat ingasappallaassaqaaq”, Folketingimi ilaasortaq oqarpoq.

 

Aaja Chemnitz Larsenip ataatsimiinnermi Danmarkimi inatsisartut nunanut allanut – aamma isumannaallisaanermut politikkikkut pilersaarusiornermi imarisai nuannaarutigai minnerunngitsumillu immikkut Nunani Avannarlerni anguniakkat Danmarkimi inatsisartunit aaliangerneqartut nuannaarutigalugit.

 

Danmarkimi inatsisartunit pilersaarusiat nutaanit inuusuttut immikkut sammineqarput, soorlu aamma nutaanngorsaaneq Nunanilu Avannarlerni aningaasatigut ineriartorneq immikkut ukkatarineqarlutik. Tamanna uanga nammineerlunga sulissutiginikuuara nammineerlungalu aningaasartuutissanut inatsimmut suliassanut pilersaarusiorlunga upernaamut 2019-mut pisussamut, taamaammat nuannaarpunga”, Aaja Chemnitz Larseni oqarpoq.

 

Danmarkimi inatsisartut nunanut allanut- aamma isumannaallisaanermut politikkimut pilersaarusiaat ullumikkut saqqummiunneqarpoq Inatsisartut ataatsimiittarfianni oqallisigineqarumaarluni novemberip 22-ani, tassanilu Aaja Chemnitz Larseni aamma ilaajumaarpoq.

Print Friendly, PDF & Email